1 kuThimothewu 2 - IBHAYIBHELI ELINGCWELE

Imithetho yenkonzo yebandla

¹ Ngakho-ke kuqala kukho konke ngiyala ukuba ukunxusa, nokukhuleka, nokucela, nokubonga kwenzelwe abantu bonke,

² amakhosi nabo bonke abakhulu, ukuze sihlale kahle nangokuthula, ngokumesaba uNkulunkulu nangesizotha esipheleleyo.

³ Lokhu kuhle, kuyabongeka emehlweni kaNkulunkulu uMsindisi wethu

⁴ othanda ukuba abantu bonke basindiswe, bafinyelele ekulazini iqiniso.

⁵ Ngokuba munye uNkulunkulu, munye nomlamuleli phakathi kukaNkulunkulu nabantu, umuntu uKristu Jesu,

⁶ owazinikela abe yinhlawulo yabo bonke, kube ngubufakazi besikhathi esiyiso,

⁷ engamiselwa khona mina ukuba ngibe ngummemezeli nomphostoli – ngikhuluma iqiniso, angiqambi amanga – yebo, umfundisi wabezizwe ekukholweni naseqinisweni.

⁸ Ngalokho ngithanda ukuba amadoda akhuleke ezindaweni zonke, ephakamisa izandla ezingcwele, engenalulaka nokuphikisana.

Maqondana nabesifazane ebandleni

⁹ Ngokunjalo nabesifazane mabagqoke izingubo ezifaneleyo, bazihlobise ngokuhlonipha nokuqonda, kungabi ngezinwele ezalukiweyo, nangegolide, nangamaparele,* nangezambatho ezinemali eningi,

¹⁰ kepha njengokufanele abesifazane abashoyo ukuthi besaba uNkulunkulu bahlobe ngemisebenzi emihle.

¹¹ Owesifazane makafunde ukuthula nokuthobeka konke.

¹² Kepha angimvumeli owesifazane ukuba afundise, nokuba abuse phezu kwendoda; kodwa makazithulele.

¹³ Ngokuba u-Adamu wabunjwa kuqala, emva kwalokho u-Eva.

¹⁴ Futhi u-Adamu kakhohliswanga, kepha owesifazane wathi ekhohlisiwe, waphambuka;

¹⁵ kepha uyakusindiswa ngokuzala abantwana, uma behlala ekukholweni nasothandweni nasebungcweleni kanye nokuqonda.