U-Isaya 48 - IsiZulu 2020

USimakade Umemezela Ngezinto Ezintsha

¹ “Yizwa lokhu wena ndlu kaJakobe, obizwa ngegama lika-Israyeli, ovela okhalo lukaJuda, ofunga igama likaSimakade, nobiza uNkulunkulu ka-Israyeli kungengaqiniso nakulunga.

² Ngokuba bazibiza ngomuzi ongcwele, bencika kuNkulunkulu ka-Israyeli, nguSimakade Wamabandla, igama lakhe.

³ Ngimemezele izinto zakuqala esikhathini esedlule, ezaphuma emlonyeni wami; ngazizwakalisa, ngazenza, zenzeka ngokuphazima.

⁴ Ngokuba bengazi ukuthi ninenkani, nentamo yenu ingumsipha wensimbi, nebunzi lenu liyithusi;

⁵ ngazimemezela kini kwasemandulo zingakenzeki, ngazizwakalisa, ningaze nithi: ‘Yisithombe sami esizenzile, isithombe sami esibaziweyo, nesithombe sami esibunjiweyo, esiyalezile.’

⁶ Nizwile, manje bhekani konke lokhu; aniyukukumemezela na? “Kusukela manje ngizokwazisa okusha, yebo, nokusithekileyo ongazange ukwazi.

⁷ Kudalwe manje, hhayi emandulo; awukaze uzwe ngakho ngaphambi kwalolu suku, funa uthi: ‘Bheka, bengikwazi.’

⁸ Yebo, awukaze ukuzwe, awukaze ukwazi, kwasemandulo indlebe yakho ayivulwanga, ngokuba bengazi ukuthi ukhohlakele, nokuthi kwasesibelethweni wabizwa ngomhlubuki.

⁹ Ngenxa yeGama lami, ngiyoyilibazisa intukuthelo yami; nangenxa yodumo lwami, ngizakuyibambela wena, ukuze ngingakunqumi.

¹⁰ Bheka, ngikucwengisisile, kodwa hhayi njengesiliva; ngakuvivinya esithandweni sezinhlupheko.

¹¹ Ngenxa yami, impela ngenxa yami, ngiyokwenza. Kungani iGama lami lingcoliswa na? Angiyukuyinika omunye inkazimulo yami.

¹² “Ngilalele, Jakobe, wena Israyeli, obiziweyo wami; ngisenguye, ngingowokuqala, futhi ngingowokugcina.

¹³ Yebo, isandla sami sibekile isisekelo somhlaba, nesokunene sami saleneka izulu. Lapho ngikubiza, kuma ndawonye.

¹⁴ “Qoqanani nina nonke, nizwe; ngubani phakathi kwabo omemezele lezi zinto na? USimakade uyamthanda, uyoyifeza intando yakhe eBhabhele, nengalo yakhe imelane namaKhaledi.

¹⁵ Mina, Mina ngikhulumile, futhi ngimbizile, ngimlethile, uyoyenza iphumelele indlela yakhe.

¹⁶ “Sondelani kimi, nizwe lokhu; angikushongo yini ekusithekeni kwasekuqaleni na? Kusukela esikhathini okwenzeka ngaso, ngangikhona.” Manje uSimakade uNkulunkulu ungithumile, kanye noMoya wakhe.

¹⁷ Usho kanje uSimakade uMhlengi wakho oNgcwele ka-Israyeli, uthi: “NginguSimakade uNkulunkulu wakho okufundise okukusizayo, nokuholile ngendlela okumele uhambe ngayo.

¹⁸ Sengathi ngabe wayilalelisisa imiyalo yami! Khona ukuthula kwakho bekuyokuba njengomfula, nokulunga kwakho njengamanzi olwandle,

¹⁹ nezizukulwane zakho zibe ngangesihlabathi, nabantwana bezibilini zakho babe njengezinhlayiya zaso. Igama labo belingayukuqedwa, belingeke lashabalala phambi kwami.”

Isiyalezo Sokuphuma EBhabhele

²⁰ Phumani eBhabhele nibalekele amaKhaledi; kumemezeleni lokho ngezwi lokujabula, nikuzwakalise, nikuphumisele nasemikhawulweni yomhlaba, nithi: “USimakade uyihlengile inceku yakhe, uJakobe.”

²¹ Kabazange bome lapho ebahola ezindaweni ezigagadekile; wenza ukuba amanzi agobhozele edwaleni; waqhekeza idwala, amanzi ampompoza.

²² “Akukho ukuthula kwababi,” kusho uSimakade.