U-Amose 7 - IsiZulu 2020

Imibono Nezexwayiso U-Amo. 7 – 9 Umbono Wokuqala: Isikhonyane

¹ INkosi uSimakade yangibonisa kanje umbono: Bheka, yayenza isikhonyane ekuqaleni kokuhluma kotshani bakamuva. Uyabona-ke, kwakungutshani bakamuva osebusikiwe bungobenkosi.

² Kwathi lapho isikhonyane sesibudle sabuqothula nya utshani ezweni, ngathi: “Nkosi Simakade, ake uthethelele; uyakuma kanjani uJakobe ngokuba mncane?”

³ USimakade waxola ngalokhu. “Ngeke kusenzeka,” kusho uSimakade.

Umbono Wesibili: Isomiso

⁴ INkosi uSimakade yangibonisa kanje: Bheka, iNkosi uSimakade yaphaka impi ngomlilo; wangqongqisa ekujuleni okukhulu, washisa nengxenye.

⁵ Ngase ngithi: “Nkosi Simakade, ake uyeke; uyakuma kanjani uJakobe ngokuba mncane?”

⁶ USimakade waxola ngalokhu. “Ngeke kusenzeka,” kusho uSimakade.

Umbono Wesithathu: Intambo Yokulinganisa

⁷ Yangibonisa kanje: Bheka, uSimakade wayemi ngasodongeni olwakhiwe lwalinganiswa ngentambo yomthofu, ephethe esandleni sakhe intambo yomthofu yokulinganisa.

⁸ USimakade wathi kimi: “Amose, ubonani na?” Ngathi: “Intambo yomthofu yokulinganisa.” INkosi yayisithi: “Uyabona-ke, sengizobeka intambo yomthofu yokulinganisa phakathi kwabantu bami u-Israyeli angisayukubaxolela.

⁹ “Izindawo eziphakemeyo zika-Isaka ziyakubhidlizwa, nezindlu zokukhonzela zakwa-Israyeli ziyakudilizwa, ngiyakubhuqabhuqa indlu kaJerobhowamu ngenkemba yami.”

Ukungqubuzana Kuka-Amose No-Amaziya

¹⁰ U-Amaziya umphristi waseBhethele wathumela kuJerobhowamu inkosi yakwa-Israyeli, wathi: “U-Amose ukwakhele uzungu kubantu bakwa-Israyeli; izwe alinakumelana nawo wonke amazwi akhe.

¹¹ Ngokuba u-Amose ukhulume kanje, wathi: “UJerobhowamu uyakufa ngenkemba, u-Israyeli athunjwe impela ezweni lakhe.”

¹² U-Amaziya wayesethi ku-Amose: “Wena mboni, phuma uphele lapha uye ezweni lakwaJuda, udle khona isinkwa, futhi uphrofethe lapho;

¹³ ungaphindi uphrofethe futhi eBhethele, ngokuba liyindlu engcwele yenkosi, nendlu yombuso.”

¹⁴ U-Amose waphendula wathi ku-Amaziya: “Angiyena umphrofethi mina, futhi angiyona indodana yomphrofethi, kodwa ngangingumelusi nomlimi wemithombe.

¹⁵ Kepha uSimakade wangiyekisa ukwelusa umhlambi; wathi kimi: ‘Hamba uphrofethe kubantu bami u-Israyeli.’

¹⁶ Ngakho-ke lalela izwi likaSimakade. Wena uthi: “ ‘Ungaphrofethi ngokumelene no-Israyeli, ungalokothi uphrofethe okubi ngendlu ka-Isaka.’

¹⁷ “Ngakholo-ke usho kanje uSimakade, uthi: “ ‘Umkakho uyakufeba emzini, amadodana namadodakazi akho ayakufa ngenkemba, nezwe lakho liyakulinganiswa ngentambo labiwe, wena uyakufela ezweni elingcolileyo, u-Israyeli athunjwe impela ezweni lakhe.’ ”