UZakariya 3 - IsiZulu 2020

Umbono Wesine: UJoshuwa Umphristi Omkhulu

¹ Wayesengikhombisa uJoshuwa umphristi omkhulu emi phambi kwengelosi kaSimakade, noSathane wayemi ngakwesokunene sakhe emmangalela.

² USimakade wathi kuSathane: “USimakade uyakukhuza, Sathane. Impela, uSimakade okhethe iJerusalema uyakukhuza. Lona akasiso yini isikhuni esophulwe emlilweni na?”

³ UJoshuwa wayembethe izingubo ezingcolileyo, emi phambi kwengelosi.

⁴ Yayala ababemi phambi kwakhe, yathi: “Mkhumuleni izingubo ezingcolileyo.” Yayisithi kuye: “Uyabona, sengisisusile kuwe isiphambeko sakho; ngizokwembathisa izingubo zobukhosi.”

⁵ Yayisithi: “Methweseni umshuqulu ohlanzekileyo ekhanda.” Base bemethwesa umshuqulu ohlanzekileyo ekhanda, bamembathisa izingubo, ingelosi kaSimakade yayimile.

⁶ Ingelosi kaSimakade yamyala uJoshuwa, ithi:

⁷ “Usho kanje uSimakade Wamabandla, uthi: ‘Uma uhamba ngezindlela zami, ugcine imiyalo yami, uyakuphatha endlini yami, unakekele namagceke ami; ngiyakwenza uhambe phakathi kwalaba abami lapha.

⁸ “ ‘Ake ulalele, Joshuwa, mphristi omkhulu, wena nobambisene nabo abahlala phambi kwakho, ngokuba bangabantu abayisibonakaliso: niyabona-ke, sengizakuletha inceku yami, uHlumela.

⁹ Ngokuba bheka, itshe engilibeke phambi kukaJoshuwa kukhona amehlo ayisikhombisa etsheni lilodwa ngiyakuqopha umbhalo kulo, bese ngisusa bonke ububi baleli lizwe ngalusuku lunye,’ ” kusho uSimakade Wamabandla.

¹⁰ “ ‘Ngalolo lusuku, yilowo nalowo uyakumema umakhelwane wakhe, phansi komvini naphansi komkhiwane.’ ”