UZakariya 1 - IsiZulu 2020

Abantu Mababuyele KuSimakade

¹ Ngenyanga yesishiyagalombili, ngonyaka wesibili, wokubusa kukaDariyu, izwi likaSimakade lafika kuZakhariya indodana kaBherekhiya ka-Ido, umphrofethi, lathi:

² “Impela uSimakade wayebathukuthelele kakhulu okhokho bakho.

³ Kepha wena batshele, uthi: Usho kanje uSimakade Wamabandla, uthi: ‘Buyelani kimi,’ kusho uSimakade Wamabandla, ‘nami ngizobuyela kini,’ kusho uSimakade Wamabandla.

⁴ “Ningafani nokhokho benu okwathi lapho abaphrofethi bakuqala bememezela kubo, bethi: Usho kanje uSimakade Wamabandla, uthi: ‘Ake niphenduke ezindleleni zenu ezimbi nasezenzweni zenu zobubi,’ kodwa abalalelanga, futhi abazange banginake, kusho uSimakade.

⁵ “Baphi okhokho benu na? Ngabe abaphrofethi basaphila yini kuze kube phakade na?

⁶ Kanti amazwi ami nezimiso zami engayaleza ngakho izinceku zami abaphrofethi akufinyelelanga yini kokhokho benu na? Angithi baphenduka, bathi: ‘Njengoba uSimakade Wamabandla ebehlelile ukwenza lokhu kithi ngokwezindlela zethu nangemisebenzi yethu, wenze kanjalo-ke kithi.’ ”

Imibono KaZakhariya UZak. 1:7 – 6:8

⁷ Ngosuku lwama-24 ngenyanga ye-11 kaShebhati, ngonyaka wesibili wokubusa kukaDariyu, izwi likaSimakade lafika kuZakhariya indodana kaBherekhiya ka-Ido, umphrofethi, lathi:

⁸ Ngabona umuntu ebusuku egibele ihhashi elibomvu, wama phakathi kwezihlahla zombomvana ezazisemhosheni, emva kwakhe kwakukhona amahhashi abomvu, amahwaqahwaqa, namhlophe.

⁹ Ngase ngithi: “Bangobani laba na?” Ingelosi eyayikhuluma nami yathi kimi: “Ngiyakukuchazela ukuthi bangobani laba.”

¹⁰ Umuntu owayemi phakathi kwezihlahla zombomvana wathi: “Laba ngabathunywe nguSimakade ukuba bahambe emhlabeni.”

¹¹ Base beyibikela ingelosi kaSimakade eyayimi phakathi kwezihlahla zombomvana, bathi: “Sihambile emhlabeni; uyabona-ke, wonke umhlaba uhleli ngokuthula.”

¹² Yayisiphendula ingelosi kaSimakade, yathi: “Simakade Wamabandla, kuyoze kube nini ungalihawukeli iJerusalema nemizi yakwaJuda oyithukuthelele le minyaka engama-70 na?”

¹³ USimakade wayiphendula ingelosi eyayikhuluma nami ngamazwi amahle, aduduzayo.

¹⁴ Ingelosi eyayikhuluma nami yayisithi kimi: “Memezezela lokhu uthi: Usho kanje uSimakade Wamabandla, uthi: ‘Nginesikhwele ngokwedlulele ngeJerusalema neZiyoni.

¹⁵ Ngizithukuthelele kakhulu izizwe ezinethezekileyo, ngokuba uma ngithukuthele kancane nje, zona ziyadlanga ngobubi.’

¹⁶ “Ngalokho usho kanje uSimakade, uthi: ‘Ngiyakubuyela eJerusalema ngesihawu, indlu yami iyakwakhiwa kulo, kudonswe intambo yokulinganisa phezu kweJerusalema,’ kusho uSimakade Wamabandla.

¹⁷ “Memezela lokhu futhi, uthi: Usho kanje uSimakade Wamabandla, uthi: ‘Imizi yami iyakugcwala ichichime okuhle, uSimakade abuye aliduduze iZiyoni, aphinde alikhethe neJerusalema.’ ”

¹⁸ Ngase ngiphakamisa amehlo ami, ngabona kukhona izimpondo ezine.

¹⁹ Ngayibuza ingelosi eyayikhuluma nami, ngathi: “Ziyini lezi?” Yathi kimi: “Lezi yizimpondo ezihlakaze uJuda, u-Israyeli, neJerusalema.”

²⁰ USimakade wayesengikhombisa abakhandinsimbi abane bensimbi abane.

²¹ Ngabuza ngathi: “Laba bazokwenzani na?” Waphendula wathi: “Lezi yizimpondo ezahlakaza uJuda kangangoba akukho muntu ophakamisa ikhanda lakhe. Kepha laba bakhandinsimbi bensimbi bazobathuthumelisa, balahle phansi izimpondo zabezizwe ezaphakamisa uphondo zamelana nezwe lakwaJuda ukuba lihlakazwe.”