UmShumayeli 10 - IsiZulu 2020

Ukuhlakanipha Nobuwula

¹ Izimpukane ezifile zenza amakha abe nephunga elibi; kanjalo nobuwula obuncane buyakwedlula ukuhlakanipha nodumo.

² Inhliziyo yomuntu ohlakaniphile inamathela kokuhle, kodwa inhliziyo yesiwula ibheka kwesobunxele.

³ Ngisho sihamba emgwaqweni isiwula siveza ubuwula baso, sitshela bonke ukuthi sona siyisiwula.

⁴ Uma ulaka lombusi lukuvukela, uze ungasuki endaweni yakho; ukuthobeka kulungisa amaphutha amakhulu.

⁵ Kukhona ububi engibubonile phansi komthunzi welanga, bunjengephutha elenziwa ngumbusi:

⁶ ubuwula bubekwa ezindaweni eziningi eziphakemeyo, abacebile bahlala endaweni ephansi.

⁷ Ngibone izigqila zigibele amahhashi, izikhulu zihamba ngezinyawo njengezigqila.

⁸ Umuntu ombela omunye umgodi uyokhalakathela kuwo; nalowo odiliza udonga uyolunywa yinyoka.

⁹ Omba amatshe ulinyazwa yiwo; nocanda izinkuni ulinyazwa yizo.

¹⁰ Uma imbazo ibuthuntu, umuntu engayilolanga, usebenzisa amandla amakhulu; kodwa ukuhlakanipha kuletha ithuba lempumelelo.

¹¹ Uma inyoka iluma ingalunjiwe, akanalusizo lwalutho umlumbi.

¹² Amazwi ohlakaniphileyo amlethela udumo, kodwa awesiwula ayasibhubhisa.

¹³ Siwuvula nje umlomo waso sikhuluma ubuwula, kuthi ekugcineni inkulumo yaso ibe ngukuhlanya okubi.

¹⁴ Isiwula sikhuluma amagama amaningi, kodwa akukho muntu owaziyo ukuthi kuzokwenzekani, nongasho ukuthi yini ezolandela uma sesifile?

¹⁵ Umshikashika weziwula uyazikhandla zingabe zisayazi indlela eqonde emzini.

¹⁶ Maye, kuwe lizwe elibuswa yinkosi esencane, izikhulu zakho zizitika ngedili kusuka ekuseni!

¹⁷ Ubusisiwe wena lizwe obuswa yinkosi evuthiwe nehloniphekile, izikhulu zakho zizitika ngedili ngesikhathi esifaneleyo, ukuze zibe namandla, hhayi ukuba zidakwe!

¹⁸ Ngenxa yobuvila uphahla luyapatalala, nangenxa yokudembesela izinto indlu iyanetha.

¹⁹ Ukudla kwenzelwe ukwenama, newayini ukuba kuthakaswe, imali iyimpendulo yezinto zonke.

²⁰ Ungayiqalekisi inkosi ngisho emcabangweni wakho; kumbe uqalekise ocebileyo, ulele ekamelweni lakho; ngokuba inyoni yezulu ingase ikuthwale okushilo, noma yini enamaphiko ingayikhuluma indaba.