UmShumayeli 1 - IsiZulu 2020

Konke Kuyize Leze

¹ Amazwi oMshumayeli, indodana kaDavide, inkosi yaseJerusalema.

UMshumayeli:

² “Ize leze,” kusho uMshumayeli, “ize leze, konke kuyize!”

³ Uzuzani umuntu ngawo wonke umshikashika wakhe awushikashika phansi komthunzi welanga na?

⁴ Isizukulwane siyafika, sedlule, kodwa umhlaba umi ingunaphakade.

⁵ Ilanga liyaphuma, lishone, lisheshe liye endaweni yalo lapho liphuma khona.

⁶ Umoya uvunguza uye eningizimu, uphendukele enyakatho, uphenduphenduke, ubuyele lapho uqale khona.

⁷ Yonke imifula igelezela olwandle, kodwa ulwandle alugcwali; lapho imifula ike yageleza khona, isayophinde futhi igeleze khona.

⁸ Zonke izinto ziyakhandla, umuntu angezichaze. Iso alideli ngokubona, nendlebe ayigcwali ngokuzwa.

⁹ Okwake kwaba khona, kuyobuye kube khona, nokwake kwenziwa kuyobuye kwenziwe. Ayikho into entsha phansi komthunzi welanga.

¹⁰ Ikhona yini into okuthiwa ngayo: “Bheka, lokhu kusha?” Empeleni seyake yaba khona emandulo, singakabi bikho.

¹¹ Akukho ukukhunjulwa kwezinto esezedlule, nokwalezo ezisayokwenziwa yilabo abalandelayo.

Ukufuna Ukuhlakanipha Kuyize

¹² Mina Mshumayeli ngangiyinkosi yakwa-Israyeli, eJerusalema.

¹³ Ngazinikela ngenhliziyo yami yonke ukufuna nokucwaninga ngokuhlakanipha yonke into eyenziwa phansi komthunzi welanga. Kungumsebenzi okhathazayo uNkulunkulu awunikeze abantu ukuba babe matasatasa ngawo.

¹⁴ Ngiyibone yonke imisebenzi eyenziwa phansi komthunzi welanga; impela konke kufana nokubamba utalagu!

¹⁵ Okugobile ngeke kuqondiswe, okungekho ngeke kwabalwa.

¹⁶ Ngase ngithi enhliziyweni yami: “Ngizuze ukuhlakanipha okukhulu ukwedlula bonke abangendulela ekubuseni eJerusalema. Yebo, inhliziyo yami izuze ukuhlakanipha okukhulu nokuqonda.

¹⁷ Ngizinikele ngenhliziyo yami yonke ukwazi ukuhlakanipha nokwazi ubuwula nobuthutha. Ngithole ukuthi konke lokho kufana nokubamba utalagu.

¹⁸ Ukwanda kokuhlakanipha kwandisa inkathazo; owandisa ulwazi, wandisa usizi.”