UJobe 35 - IsiZulu 2020

U-Elihu Uthi UNkulunkulu Umelwe Ukufunwa Ngokuthobeka

¹ U-Elihu wakhuluma wathi:

² “Ucabanga ukuthi lokhu kulungile yini na? Uthi: ‘Mina ngilungile phambi kukaNkulunkulu,’

³ uthi: ‘Kungisiza ngani na?’ nokuthi: ‘Ngizuzeni ebengingayizuza uma bengingonanga na?’

⁴ “Ngizoniphendula mina, wena nabangani bakho.

⁵ Bheka ezulwini, ubone, uqaphele ukuthi amafu angaphezu kwakho.

⁶ Uma wona, wenzani kuye na? Uma wenza iziphambeko eziningi kwenzani kuye lokho na?

⁷ Uma ulungile, utholani yena ngalokho, uzuzani esandleni sakho na?

⁸ Ukukhohlakala kwakho kuthinta abanye abantu abafana nawe, kanjalo nokulunga kwakho kuthinta abanye abantu.

⁹ “Ngenxa yokwanda kokucindezelwa, abantu bayakhononda, bayakhala, banxusa ukusizwa esandleni esinamandla.

¹⁰ Kepha akekho othi: ‘Uphi uNkulunkulu, uMdali wami ovusa ingoma kwesikabhadakazi.

¹¹ Thina nezilwane zomhlaba usifundisa okuningi, asenze sihlakaniphe kakhulu kunezinyoni ezindiza emkhathini.’

¹² Abantu akabaphenduli uma bekhala, ngenxa yokuzikhukhumeza kwezikhohlakali.

¹³ Impela uNkulunkulu akakulaleli ukukhala okuyize, uSomandla akakugqizi qakala.

¹⁴ Kakhulu kangakanani uma uthi awuboni, nokuthi icala liphambi kwakhe, wena ulindele Yena!

¹⁵ Kepha manje, ngoba intukuthelo yakhe ayijezisi, akazinaki kakhulu iziphambeko,

¹⁶ uJobe uvula umlomo wakhe, akhulume okuyize, wandisa amazwi engenalwazi.”