UJobe 18 - IsiZulu 2020

Inkulumo Yesibili KaBhilidadi

¹ UBhilidadi umShuhi wayesethatha, ethi:

² “Uyokuyeka nini lokhu kukhuluma na? Ake ucabangisise, bese siyakhuluma.

³ Kungani sithathwa njengezilwane, siyizithutha yini emehlweni akho na?

⁴ Wena ozidwengulayo ngenxa yolaka lwakho, umhlaba uyoshiywa yini ngenxa yakho, nedwala lisuswe endaweni yalo emhlabeni na?

⁵ Yebo, ukukhanya kwesikhohlakali kuyacishwa, nelangabi lomlilo waso aliyukukhanya.

⁶ Ukukhanya kuyafiphala ethendeni laso, nesibani saso siyacima phezu kwaso.

⁷ Izinyathelo zaso ezinamandla ziyafinyezwa, namasu aso asiqumbe phansi.

⁸ Ngokuba izinyawo zaso zibanjwe enethini, sihamba phezu komwowane.

⁹ Unoxhaka usibambe esithendeni, nogibe lwasibamba.

¹⁰ Sithukuselwe isihibe emhlabathini, nonoxhaka endleleni.

¹¹ Ingebhe iyasethusa nxazonke, isezithendeni zaso.

¹² Inhlupheko isilambele, nenhlekelele isilindele lapho sikhubeka.

¹³ Izingxenye zesikhumba saso ziyakudliwa, yebo, izibulo lokufa kuyawadla amalungu aso.

¹⁴ Siyakususwa ethendeni laso esilethembayo, siyiswe enkosini yengebhe.

¹⁵ Ethendeni laso kuyohlala okungesibo abaso, indawo yaso ichelwe ngesibabuli.

¹⁶ Kuyokoma izimpande zaso phansi, phezulu kubune amagatsha aso.

¹⁷ Kuyakuphela ukukhunjulwa kwaso emhlabeni, kungabi bikho okhumbula igama laso emigwaqweni.

¹⁸ Siyakuxoshwa ekukhanyeni, siyiswe ebumnyameni, sixoshwe emhlabeni.

¹⁹ Asiyukuba nabantwana noma abazukulu phakathi kwabakubo, noyosinda lapho sasihlala khona.

²⁰ Abasentshonalanga bethuswa lusuku lwaso, nabasempumalanga bakhungathwa ngukwesaba.

²¹ Impela lezi yizindlu zowenza okubi, impela lena yindawo yongamazi uNkulunkulu.”