UGenesise 25 - IsiZulu 2020

Amadodana Ka-Abhrahama Awazala KuKethura

¹ U-Abhrahama wabuye wathatha enye inkosikazi okuthiwa nguKethura.

² Yamzalela uZimrani, uJokishani, uMedani, uMidiyani, u-Ishibhaki, noShuwa.

³ UJokishani wayenguyise kaShebha noDedani. Amadodana kaDedani kwakungama-Ashuri, amaLethushi, namaLewumi.

⁴ Amadodana kaMidiyani: kwakungu-Efa, u-Eferi, uHanokhi, u-Abhida, no-Elda. Bonke laba babeyizizukulwane zikaKethura.

⁵ U-Abhrahama walabela u-Isaka lonke ifa lakhe,

⁶ kodwa amadodana ezancinza zakhe, u-Abhrahama wawanika izipho esaphila, wayeseyawaqhelisa endodaneni yakhe u-Isaka, aya ngasempumalanga, empumalanga.

Ukufa Nokungcwatshwa Kuka-Abhrahama

⁷ Isiyonke iminyaka eyaphilwa ngu-Abhrahama yayiyi-175.

⁸ U-Abhrahama wafa esemdala kakhulu, egculisekile yiminyaka ayiphilile, wangcwatshwa koyisemkhulu.

⁹ Amadodana akhe u-Isaka no-Ishmayeli bamngcwaba emgedeni eMakhaphela osensimini ka-Efroni indodana kaZowari umHithi, empumalanga neMamre,

¹⁰ insimu u-Abhrahama ayeyithenge kumaHithi. U-Abhrahama wangcwatshwa lapho kwathunwa khona umkakhe uSara.

¹¹ Esefile u-Abhrahama, uNkulunkulu wayibusisa indodana yakhe u-Isaka. U-Isaka wakha e-Ebheri Lahayi Royi.

Izizukulwane Zika-Ishmayeli

¹² Nazi izizukulwane zika-Ishmayeli indodana ka-Abhrahama, ayizalelwa yisigqila sikaSara, uHagari umGibhithe.

¹³ Lawa ngamagama amadodana ka-Ishmayeli ngokwelamana kwawo: izibulo kwakunguNebhayothi, kulandele uKheda, u-Adibhiyeli, uMibhisamu,

¹⁴ uMishima, uDuma, uMasa,

¹⁵ uHadadi, uThema, uJethuri, uNaphishi, noKedema.

¹⁶ Yilawo-ke amagama amadodana ka-Ishmayeli ngokwakha kwawo emizaneni yawo, nangokuma kwawo enkanjini, ayizinhloko zezizwana ezilishumi nambili.

¹⁷ Isiyonke iminyaka yokuphila kuka-Ishmayeli yayiyi-137. Wafa, wangcwatshwa koyisemkhulu.

¹⁸ Izizukulwane zakhe zakha kusukela eHavila kuyoshaya eShuri, eduze nomngcele eGibhithe uma ulibhekise e-Ashuri. U-Ishmayeli wayengumdlwembe phakathi kwabafowabo, ehlala ebachukuluza.

Ukuzalwa Kuka-Esawu NoJakobe

¹⁹ Nanku umlando ka-Isaka indodana ka-Abhrahama: u-Abhrahama wazala u-Isaka.

²⁰ U-Isaka wayeseneminyaka engama-40 ngesikhathi eganwa nguRibheka indodakazi kaBhethuweli umAramu wasePhadani Aramu; wayengudadewabo kaLabani umAramu.

²¹ U-Isaka wamkhulekela kuSimakade uRibheka umkakhe, ngokuba wayengabatholi abantwana, iNkosi yawuzwa umkhuleko wakhe, uRibheka wakhulelwa.

²² Abantwana babeqhubukushana ngaphakathi kuye, waze wathi: “Uma kuzoba nje, pho ngisaphilelani na?” Wayeseyobuza kuSimakade.

²³ USimakade wathi kuye: “Esibelethweni sakho kukhona izizwe ezimbili; izinhlobo ezimbili zabantu ozozizala. Ziyakwehlukana ezibilini zakho; esinye isizwe siyakwehlula esinye, omkhulu akhonze omncane.”

²⁴ Kwathi sesifikile isikhathi sokubeletha, wazibula ngamawele.

²⁵ Owabona ilanga kuqala wayenomzimba ompofu ngebala, ephuphuzela uboya bunjengobesiphuku, lona wamqamba igama wathi ngu-Esawu.

²⁶ Emva kwakhe kwazalwa umfowabo owaphuma ebambelele esithendeni sika-Esawu, wamqamba igama wathi nguJakobe. U-Isaka wayeneminyaka engama-60 ngesikhathi kuzalwa laba bafana.

²⁷ Bakhula abafana, u-Esawu waba yiphisi, ekhonze ukuhlala endle; uJakobe wayengumuntu othule engumnqolo, ehlala emathendeni.

²⁸ U-Isaka wayemthanda kakhulu u-Esawu, ngokuba wayeyithanda inyama yenyamazane, kanti uJakobe wayethandwa kakhulu ngunina uRibheka.

U-Esawu Uthengisa Ngelungelo Lobuzibulo Bakhe

²⁹ Langa limbe uJakobe epheke isilovela samalentili, kwafika u-Esawu evela endle, eyetha yindlala.

³⁰ U-Esawu wathi kuJakobe: “Ake ungiphe kuleso silovela sakho esibomvu, ngafa yindlala.” Kungakho kuthiwa ungu-Edomi.

³¹ UJakobe wathi: “Ngithengisele kuqala ilungelo lobuzibulo bakho.”

³² U-Esawu wathi: “Ngiyafa yiphango. Linamsebenzi muni ilungelo lobuzibulo bami kimi na?”

³³ UJakobe wathi: “Funga kuqala.” Wayesefunga-ke. U-Esawu wadayisa kanjalo-ke ngelungelo lobuzibulo bakhe kuJakobe.

³⁴ UJakobe wayesemupha isinkwa nesilovela samalentili. U-Esawu wadla, waphuza, wahamba. U-Esawu walidela kanjalo ilungelo lobuzibulo bakhe.