UGenesise 11 - IsiZulu 2020

Umbhoshongo WaseBhabhele

¹ Emhlabeni wonke abantu babekhuluma lulimi lunye.

² Basuka empumalanga baze bayofika emathafeni eShinari, bahlala khona.

³ Babonisana, bathi: “Wozani sibumbe izitini, sizipheke emlilweni ukuze ziqine!” Esikhundleni samatshe babumba izitini, esikhundleni sodaka benza ibhithumeni.

⁴ Base bethi: “Wozani sizakhele isithabathaba somuzi onombhoshongo omude ofinyelela esibhakabhakeni, ukuze ngawo sizakhele igama emhlabeni, singahlakazeki nezwe lonke!”

⁵ USimakade wehla ukuzobona umuzi nombhoshongo owawakhiwe ngabantu.

⁶ Wathi: “Bheka, laba bantu basizwe sinye, bakhuluma lulimi lunye. Lokhu kuseyisiqalo nje sezinto abazozenza. Manje sebezokwenza noma yini abazimisele ukuyenza.

⁷ Wozani sehle, siphambanise ulimi lwabo, khona bezogcina bengasezwani ukuthi omunye uthini komunye.”

⁸ USimakade wabahlakaza kanjalo-ke bagcwala umhlaba wonke, bakuyeka ukwakha umuzi.

⁹ Lowo muzi wabizwa ngokuthi yiBhabhele, ngokuba kulapho uSimakade aphambanisa khona ulimi lomhlaba wonke, wayesebahlakaza bagcwala umhlaba wonke.

Izizukulwane ZikaShemu

¹⁰ Nanku umlando wezizukulwane zikaShemu. Kwaphela iminyaka emibili unqamukile uzamcolo, uShemu eseneminyaka eyikhulu, wazala u-Arifaksadi.

¹¹ Esemzele u-Arifaksadi, waphila iminyaka engama-500: wayezele namanye amadodana namadodakazi.

¹² Kuthe u-Arifaksadi eseneminyaka engama-35, wazala uShela.

¹³ Emva kokuzala uShela, u-Arifaksadi waphila iminyaka engama-403, wabuye wazala amadodana namadodakazi.

¹⁴ UShela wayeseneminyaka engama-30 ezala u-Ebhere.

¹⁵ Esemzele u-Ebhere, waphila iminyaka engama-403, wabuye wazala amadodana namadodakazi.

¹⁶ Kuthe u-Ebhere eseneminyaka engama-34, wazala uPhelegi.

¹⁷ Esemzele uPhelegi, u-Ebhere waphila iminyaka engama-430, wabuye wazala amadodana namadodakazi.

¹⁸ UPhelegi eseneminyaka engama-30, wazala uRegu.

¹⁹ Esemzele uRegu, uPhelegi waphila iminyaka engama-209, wabuye wazala amadodana namadodakazi.

²⁰ URegu eseneminyaka engama-32, wazala uSerugi.

²¹ Esemzele uSerugi, uRegu waphila iminyaka engama-207, wabuye wazala amadodana namadodakazi.

²² USerugi eseneminyaka engama-30, wazala uNahori.

²³ Esemzele uNahori, uSerugi waphila iminyaka engama-200, wabuye wazala amadodana namadodakazi.

²⁴ UNahori eseneminyaka engama-29, wazala uThera.

²⁵ Esemzele uThera, uNahori waphila iminyaka eyi-119, wabuye wazala amadodana namadodakazi.

²⁶ Kuthe uThera eseneminyaka engama-70, wazala u-Abhrama, uNahori, noHarana.

Izizukulwane ZikaThera

²⁷ Nanku umlando wezizukulwane zikaThera. UThera wazala u-Abhrama, uNahori, noHarana. UHarana wazala uLothi.

²⁸ UHarana wafa kuqala kunoyise uThera ezweni ayedabuka kulo i-Uri lamaKhaledi.

²⁹ U-Abhrama noNahori baganwa. U-Abhrama waganwa nguSarayi, uNahori waganwa nguMilikha, owayeyindodakazi kaHarana, owayezala u-Isikha.

³⁰ USarayi wayeyinyumba, engenabantwana.

³¹ UThera wathatha indodana yakhe u-Abhrama noLothi owayezalwa nguHarana, nomalokazana wakwakhe uSarayi owayegane u-Abhrama, bonke base belifulathela i-Uri lamaKhaledi, balibangisa eKhanani. Bafika bahlala eHarana.

³² UThera waphila iminyaka engama-205, wafela eHarana.