UEksodusi 6 - IsiZulu 2020

Isithembiso SikaMose Siyaphindwa

¹ USimakade wathi kuMose: “Manje uzokubona engizokwenza kuFaro. Uzobadedela bahambe, ngenxa yesandla esinamandla; ngesandla esinamandla uzobaxosha ezweni lakhe.”

UNkulunkulu Umbiza Okwesibili UMose Uqoka No-Aroni

² UNkulunkulu wakhuluma noMose, wathi kuye: “NginguSimakade.

³ Ngabonakala ku-Abhrahama, ku-Isaka, nakuJakobe njengoNkulunkulu uSomandla, kodwa igama lami, ‘uSimakade’ angibazisanga lona.

⁴ Ngenza isivumelwano nabo sokubanika iKhanani, izwe ababehlala kulo njengabafokazi.

⁵ Ngikuzwile futhi ukububula kwabantu bakwa-Israyeli abenziwe izigqila ngabaseGibhithe, ngase ngisikhumbula isivumelwano sami.

⁶ Ngakho-ke yisho kubantu bakwa-Israyeli, uthi: ‘NginguSimakade, ngiyakunikhulula emithwalweni yabaseGibhithe, nginikhulule ekugqilazweni yibo, nginihlenge ngengalo eyeluliweyo nangezenzo ezinkulu zokwehlulela.

⁷ Ngizonithatha nibe ngabantu bami, futhi ngibe nguNkulunkulu wenu. Niyokwazi ukuthi Mina Simakade nginguNkulunkulu wenu, onikhululile emithwalweni yabaseGibhithe.

⁸ Ngiyakuniyisa ezweni engafunga ukulinika u-Abhrahama, u-Isaka, noJakobe; ngiyakuninika lona libe yifa lenu. NginguSimakade.’ ”

⁹ UMose wakhuluma kanjalo kubantu bakwa-Israyeli, kodwa abazange bamlalele, ngenxa yezinhliziyo ezincane nokusebenza kanzima.

¹⁰ USimakade wakhuluma kuMose, ethi:

¹¹ “Hamba ukhulume noFaro inkosi yaseGibhithe ukuba avumele abakwa-Israyeli baphume ezweni lakhe.”

¹² Kepha uMose waphendula uSimakade, wathi: “Abantu abazange bangilalele; uzongilalela kanjani uFaro nginezindebe ezingasokwanga kanje na?”

¹³ USimakade wakhuluma kuMose no-Aroni ukuba bayale abantu bakwa-Israyeli noFaro inkosi yaseGibhithe ukuba akhiphe abantu bakwa-Israyeli eGibhithe.

Abolibo LukaMose No-Aroni

¹⁴ Nazi izinhloko zokhokho ngokwezindlu zazo: amadodana kaRubeni izibulo lika-Israyeli: nguHanoki, uPhalu, uHezironi, noKharimi. Yiyo-ke le imindeni kaRubeni.

¹⁵ Amadodana kaSimeyoni: nguJemuweli, uJamini, u-Ohade, uJakhini, uZohari, noShawule indodana yowesifazane waseKhanani. Yiyo-ke leyo imindeni kaSimeyoni.

¹⁶ Lawa ngamagama amadodana kaLevi ngezizukulwane zawo: nguGereshomu, uKhohathi, noMerari. Iminyaka kaLevi yokuphila yaba yi-137.

¹⁷ Amadodana kaGereshomu: nguLibhini noShimeyi ngemindeni yawo.

¹⁸ Amadodana kaKhohathi: ngu-Amramu, uJizihari, uHebhroni, no-Uziyeli. Iminyaka kaKhohathi yokuphila yaba yi-133.

¹⁹ Amadodana kaMerari: nguMaheli noMushi; yiyo-ke le imindeni yabaLevi ngezizukulwane zayo.

²⁰ U-Amramu wathatha uJokhebedi uyisekazi, waba ngumkakhe, wamzalela u-Aroni noMose. Iminyaka ka-Amramu yokuphila yaba yi-137.

²¹ Amadodana kaJizihari: nguKhora, uNefegi, noZikhiri.

²² Amadodana ka-Uziyeli: nguMishayeli, u-Elizafani, noSithiri.

²³ U-Aroni wathatha u-Elisheba indodakazi ka-Aminadaba, udadewabo kaNaheshoni, waba ngumkakhe, wamzalela uNadabi, u-Abhihu, u-Eleyazare, no-Ithamari.

²⁴ Amadodana kaKhora: ngu-Asiri, u-Elikhana, no-Abhiyasafa. Yiyo-ke le imindeni kaKhora.

²⁵ U-Eleyazare indodana ka-Aroni wathatha enye yamadodakazi kaPhuthiyeli, yaba ngumkakhe, yamzalela uFinehasi. Yilezi-ke izinhloko zokhokho babaLevi ngemindeni yabo.

²⁶ Yibo o-Aroni noMose uSimakade athi kubo: “Khiphani abantu bakwa-Israyeli eGibhithe ngamaviyo abo.”

²⁷ Yibo laba abakhuluma noFaro inkosi yaseGibhithe ukuba ikhiphe abantu bakwa-Israyeli eGibhithe, oMose no-Aroni.

²⁸ Ngosuku uSimakade akhuluma ngalo noMose eGibhithe,

²⁹ uSimakade wathi kuye: “NginguSimakade, khuluma kuFaro inkosi yaseGibhithe konke engikutshela khona.”

³⁰ Kepha uMose wathi phambi kukaSimakade: “Njengoba nginezindebe ezingasokwanga nje, uzongizwa kanjani uFaro na?”