UEksodusi 5 - IsiZulu 2020

UMose No-Aroni Baya KukaFaro

¹ Emveni kwalokho, uMose no-Aroni baya kuFaro, bathi kuye: “Usho kanje uSimakade, uNkulunkulu ka-Israyeli, uthi: ‘Dedela abantu bami bahambe, ukuze bayogubha umkhosi wami ehlane.’ ”

² Kepha uFaro wathi: “Ungubani uSimakade ukuthi ngingalalela izwi lakhe, ngivumele u-Israyeli ahambe na? Angimazi uSimakade, futhi anginakumdedela u-Israyeli ahambe.”

³ Base bethi: “UNkulunkulu wamaHebheru ubonakele kithi; sidedele sihambe uhambo lwezinsuku ezintathu, siye ehlane, siyokwenzela uSimakade uNkulunkulu wethu umhlatshelo, funa asehlisele ngobhubhane, noma asiqothe ngenkemba.”

⁴ Kepha inkosi yaseGibhithe yathi kubo: “Mose no-Aroni, nibasuselani abantu emisebenzini yabo na? Hambani niye emisebenzini yenu.”

⁵ UFaro waqhubeka wathi: “Laba bantu sebebaningi kakhulu kunabantu bakuleli lizwe, nokho nifuna ukuba bayeke ukwenza imisebenzi yabo enzima.”

⁶ Ngalolo lusuku uFaro wayala izinduna zabantu nabaphathi babo, wathi:

⁷ “Ningabe nisabanika abantu utshani bokwenza izitini, njengoba benenza kuqala; mabahambe bazilandele utshani ngokwabo.

⁸ Kepha inani lezitini abazenzayo kufanele lifane nelezitini abazenze ngayizolo; ningalehlisi, ngokuba bayavilapha. Yingakho bekhala bethi: ‘Masihambe siyokwenzela uNkulunkulu wethu umhlatshelo.’

⁹ Mawenziwe nzima umsebenzi kubo yikhona bezonaka wona, bangawalaleli amazwi adukisayo.”

¹⁰ Izinduna nabaphathi babantu baphuma, bathi kubantu: “Nakhu okushiwo nguFaro uthi: ‘Angizukuninika utshani.’

¹¹ Hambani nizifunele nina utshani noma kuphi lapho nibuthola khona, kodwa umsebenzi wenu awuzukuncishiswa nakancane.”

¹² Ngakho-ke abantu bahlakazeka kulo lonke iGibhithe ukuyoqoqa izinhlanga esikhundleni sotshani.

¹³ Izinduna zazibakhaca zithi: “Qedani umsebenzi ngesilinganiso sansuku zonke ebenisenza ngesikhathi nisanikwa utshani.”

¹⁴ Abaphathi babakwa-Israyeli ababebekwe yizinduna zikaFaro ukubaphatha, bashaywa, babuzwa ukuthi: “Aniwuqedanga ngani umsebenzi wezitini ebeniwunqunyelwe izolo nanamuhla, njengoba benenza nsuku zonke na?”

¹⁵ Izinduna zabakwa-Israyeli zaya kuFaro, zakhala zathi: “Uziphathelani izinceku zakho kanje na?

¹⁶ Izinceku zakho azisanikwa tshani, nokho bathi kithi: ‘Yenzani izitini!’ Futhi kunjalo nje izinceku zakho ziyashaywa, kepha icala likubantu bakho.”

¹⁷ Wathi: “Niyavilapha, yingakho nithi: ‘Sidedele sihambe siyokwenzela uSimakade umhlatshelo.’

¹⁸ Hambani manje niyosebenza, ngokuba anizukunikwa tshani, kodwa nisazokwenza inani elifanayo lezitini.”

¹⁹ Izinduna zabakwa-Israyeli zazibonela ukuthi zisengxakini engakanani lapho kuthiwa kuzo: “Aniyukulehlisa inani lezitini enilenza ngosuku.”

²⁰ Zahlangana noMose no-Aroni ababemi bezozihlangabeza ngesikhathi zisuka kuFaro.

²¹ Zathi kubo: “USimakade makanibheke anehlulele. Nisenze sanuka iququ phambi kukaFaro nezinceku zakhe, nabanika inkemba ezandleni zabo ukuba basibulale.”

²² UMose wabuyela kuSimakade, wathi: “Nkosi, yini wenze okubi kulaba bantu na? Ungithumeleni mina kubo na?

²³ Selokhu ngaya kuFaro ukuyokhuluma egameni lakho, ubaphatha kabi laba bantu, futhi awubakhululi abantu bakho.”