UEksodusi 4 - IsiZulu 2020

UMose Uphiwa Amandla Okwenza Izimangaliso

¹ UMose waphendula wathi: “Kepha bheka, ngeke bangikholwe noma bangilalele, bayakuthi: ‘USimakade akabonakalanga kuwe.’ ”

² USimakade wathi kuye: “Yini le esesandleni sakho na?” Wathi: “Yinduku.”

³ Wayesethi: “Yiphonse emhlabathini.” Wayiphonsa emhlabathini, yaphenduka inyoka; uMose wayibalekela.

⁴ Kepha uSimakade wathi kuMose: “Yelula isandla sakho, uyibambe ngomsila.” Waselula isandla sakhe, wayibamba; yaphenduka induku esandleni sakhe.

⁵ “Bazokholwa-ke ukuthi uSimakade, uNkulunkulu wokhokho benu, uNkulunkulu ka-Abhrahama, uNkulunkulu ka-Isaka noNkulunkulu kaJakobe ubonakele kuwe.”

⁶ USimakade wabuye wathi kuye: “Faka isandla esifubeni sakho.” Wasifaka. Lapho esikhipha, mameshane, isandla sakhe sabe sesinochoko, simhlophe njengeqhwa.

⁷ UNkulunkulu wathi kuye: “Siphindisele esifubeni isandla sakho.” Wasiphindisela esifubeni sakhe. Kuthe lapho esesikhipha, habe, sesibuyele esimweni saso, sesifana nesikhumba sakhe.

⁸ “Uma bengakukholwa, noma bengasishayi mkhuba isibonakaliso sakho sokuqala, bayosikholwa esilandelayo.

⁹ Uma bengazikholwa zombili izibonakaliso noma bengakulaleli okushoyo, uyokukha amanzi eNayili, uwathele emhlabathini owomileyo, lawo manzi owakhe emfuleni ayophenduka igazi emhlabathini owomileyo.”

¹⁰ UMose wathi kuSimakade: “Nkosi, ngixolele, angikaze ngibe ngumuntu oyiciko lokukhuluma, kusukela kuqala kuze kube manje njengoba ukhuluma nenceku yakho, ngokuba nginamalimi, ulimi lwami lulukhuni.”

¹¹ USimakade wathi kuye: “Ngubani owenza umlomo womuntu na? Ngubani owenza isimungulu nesithulu, obonayo noyimpumputhe na? AkusiMina Simakade na?

¹² Ngalokho-ke hamba, ngizokuba semlonyeni wakho, ngikufundise ozokusho.”

¹³ Kepha wathi: “Nkosi, ngixolele, ngiyakucela ukuba uthumele omunye.”

¹⁴ Intukuthelo kaSimakade yamvuthela uMose, wathi: “Akekho yini umfowenu u-Aroni ongumLevi na? Ngiyazi ukuthi uliciko lokukhuluma; bheka, uyeza uzokuhlangabeza, lapho ekubona uyothokoza enhliziyweni yakhe.

¹⁵ Uyokhuluma naye, umtshele amazwi azowakhuluma ngomlomo wakhe, ngizokuba semlonyeni wakho nakowakhe, nginifundise enizokwenza.

¹⁶ Nguye ozokukhulumela kubantu; uyakuba ngumlomo wakho, wena ufane nonkulunkulu kuye.

¹⁷ Phatha le nduku ngesandla sakho, wenze ngayo izibonakaliso.”

UMose Ubuyela EGibhithe

¹⁸ UMose wahamba wabuyela kumukhwe wakhe uJethro, wathi kuye: “Ngiyakucela, ngivumele ngihambe, ngibuyele kubahlobo bami abaseGibhithe, ngiyobona ukuthi basaphila yini.” UJethro wathi kuMose: “Hamba ngokuthula.”

¹⁹ USimakade wathi kuMose ekwaMidiyani: “Hamba ubuyele eGibhithe, ngokuba sebafa bonke abebefuna ukukubulala.”

²⁰ UMose wathatha umkakhe namadodana akhe, wabagibelisa embongolweni, wahamba wabuyela eGibhithe. UMose wayephethe induku kaNkulunkulu ngesandla.

²¹ USimakade wathi kuMose: “Lapho usubuyele eGibhithe, qikelela ukuthi uzenze zonke izimangaliso phambi kukaFaro engakunika amandla okuba uzenze, kodwa ngiyoyenza lukhuni inhliziyo yakhe, ukuze angabavumeli abantu ukuba bahambe.

²² Uyakuthi kuFaro: ‘Usho kanje uSimakade: “U-Israyeli uyizibulo lami,

²³ ngathi kuwe: yivumele indodana yami ihambe ukuze ingikhonze, kepha wenqaba ukuyidedela ihambe, uyabona-ke, ngizoyibulala indodana yakho, izibulo lakho.” ’ ”

²⁴ Esendleleni, endaweni yokuphumula, uSimakade wahlangana naye, wafuna ukumbulala.

²⁵ UZiphora wathatha itshe elicijile wasika ijwabu lendodana yakhe, wathinta izinyawo zikaMose, wathi: “Ungumyeni wami wegazi kimi.”

²⁶ Ngalokho wamyeka uMose uSimakade, ngokuba uZiphora wathi: “Ungumyeni wami wegazi, ngenxa yokusoka.”

²⁷ USimakade wathi ku-Aroni: “Hamba uye ehlane uyohlangabeza uMose.” Wahamba, wahlangana naye entabeni kaNkulunkulu, wamanga.

²⁸ UMose wayesetshela u-Aroni wonke amazwi kaSimakade ayemthume wona, nazo zonke izibonakaliso ayemyale ukuba azenze.

²⁹ UMose no-Aroni bahamba baqoqa wonke amalunga abantu bakwa-Israyeli.

³⁰ U-Aroni wawakhuluma wonke amazwi uSimakade ayewakhulume kuMose, wenza nezibonakaliso phambi kwabantu.

³¹ Abantu bakholwa lapho bezwa ukuthi uSimakade uqaphelile, wabona futhi ukuhlupheka kwabo, base bekhothama, bakhuleka.