UDuteronomi 27 - IsiZulu 2020

Izibhebhe Zamatshe Omthetho

¹ UMose namalunga akwa-Israyeli bayala abantu, bathi: “Gcinani yonke imiyalo esiniyala ngayo namuhla.

² Kuyothi mhla niwela iJordani niya ezweni uSimakade uNkulunkulu wakho akunika lona, uyozimisela amatshe amakhulu, uwahuqe ngomcako,

³ ulobe kuwo wonke amazwi alo mthetho, uma usuwelile ukuba ungene ezweni uSimakade uNkulunkulu wakho akunika lona, izwe elichichima ubisi noju njengoba uSimakade uNkulunkulu wokhokho benu ekhulumile kuwe.

⁴ Kuyothi lapho seniliwelile iJordani, nimise lawa matshe enginiyala ngawo namuhla entabeni i-Ebhali, uwahuqe ngomcako.

⁵ Uyomakhela lapho uSimakade uNkulunkulu wakho i-althare, i-althare lamatshe, awuyukuwabaza ngento eyinsimbi.

⁶ Uyokwakha i-althare likaSimakade uNkulunkulu wakho ngamatshe apheleleyo, unikele kulo ngeminikelo yokushiswa kuSimakade uNkulunkulu wakho.

⁷ Uyonikela iminikelo yokuthula, uyidlele khona lapho, wename phambi kukaSimakade uNkulunkulu wakho.

⁸ Uyakuloba ematsheni wonke amazwi alo mthetho, uwaqophisise kahle.”

⁹ UMose nabaphristi abangabaLevi bakhuluma kuyena wonke u-Israyeli, bathi: “Thula, ulalele, Israyeli: namuhla sewuyisizwe sikaSimakade uNkulunkulu wakho.

¹⁰ Ngalokho uyolalela izwi likaSimakade uNkulunkulu wakho, ugcine imiyalo yakhe nezimiso zakhe engikuyala ngakho namuhla.”

Izibusiso Neziqalekiso

¹¹ UMose wayala abantu ngalolo lusuku, wathi:

¹² “Yilaba abazoma entabeni iGerizimu, babusise abantu ngesikhathi seniliwelile iJordani: uSimeyoni, uLevi, uJuda, u-Isakhare, uJosefa, noBhenjamini.

¹³ Nampa abayokuma entabeni i-Ebhali ukuba baqalekise: uRubeni, uGadi, u-Asheri, uZebuloni, uDani, noNafethali.

¹⁴ “AbaLevi bayophendula ngezwi elikhulu, bathi kubo bonke abantu bakwa-Israyeli:

¹⁵ “ ‘Makaqalekiswe umuntu owenza isithombe esibaziweyo nesibunjiweyo, isinengiso kuSimakade, umsebenzi wezandla zengcweti, asimise esithe.’ “Bonke abantu bayothi: ‘Amen.’

¹⁶ “ ‘Makaqalekiswe owedelela uyise nonina.’ “Bonke abantu bayothi: ‘Amen.’

¹⁷ “ ‘Makaqalekiswe ogudluza isikhonkwane sikamakhelwane wakhe.’ “Bonke abantu bayothi: ‘Amen.’

¹⁸ “ ‘Makaqalekiswe owedukisa impumputhe endleleni.’ “Bonke abantu bayothi: ‘Amen.’

¹⁹ “ ‘Makaqalekiswe ohlanekezela isehlulelo kongumfokazi, intandane, nongumfelokazi.’ “Bonke abantu bayothi: ‘Amen.’

²⁰ “ ‘Makaqalekiswe olala nomkayise, ngokuba wambulile isidwaba sikayise.’ “Bonke abantu bayothi: ‘Amen.’

²¹ “ ‘Makaqalekiswe olala nesilwane.’ “Bonke abantu bayothi: ‘Amen.’

²² “ ‘Makaqalekiswe olala nodadewabo, indodakazi kayise noma indodakazi kanina.’ “Bonke abantu bayothi: ‘Amen.’

²³ “ ‘Makaqalekiswe olala nomkhwekazi wakhe.’ “Bonke abantu bayothi: ‘Amen.’

²⁴ “ ‘Makaqalekiswe obulalela umakhelwane wakhe esithe.’ “Bonke abantu bayothi: ‘Amen.’

²⁵ “ ‘Makaqalekiswe owemukela ukufunjathiswa ukuze abulale ongenacala, achithe igazi lakhe.’ “Bonke abantu bayothi: ‘Amen.’

²⁶ “ ‘Makaqalekiswe ongawagcini amazwi alo mthetho, ukuba awenze.’ “Bonke abantu bayothi: ‘Amen.’ ”