NgokukaLuka 18 - IsiZulu 2020

Umzekeliso Ngomehluleli Nomfelokazi

¹ UJesu wayesebalandisa umzekeliso, ebafundisa ukuthi kufanele bakhuleke njalo, bangadangali.

² Wathi: “Emzini othile kwakukhona umehluleli othile owayengamesabi uNkulunkulu, futhi engenandaba namuntu.

³ Kulowo muzi kwakukhona futhi umfelokazi owayelokhu egqigqa, ethi kuye: ‘Ngenzele ubulungiswa maqondana nomelene nami.’

⁴ “Kwaba yisikhathi eside umehluleli engathandi. Kepha kamuva wadlinza, wathi: ‘Nakuba ngingamesabi uNkulunkulu, futhi ngingenandaba namuntu,

⁵ kodwa-ke ngokuba lo mfelokazi ulokhu engibelesele, ngizakumenzela ubulungiswa, funa ekugcineni angicasule.’ ”

⁶ INkosi yayisithi: “Lalelani-ke ukuthi wathini umehluleli okhohlakeleyo.

⁷ UNkulunkulu akayukubenzela yini ubulungiswa abakhethiweyo bakhe, abakhala kuye imini nobusuku, ababekezelele na?

⁸ Ngithi kini: uyakubenzela ubulungiswa ngokushesha. Ngabe iNdodana yomuntu iyokufumana yini ukukholwa emhlabeni mhla ifika na?”

Umzekeliso NgomFarisi Nomthelisi Ethempelini

⁹ UJesu wakhuluma nabanye ababezigabisa ngokuthi balungile, bedelela abanye; wabatshela lo mzekeliso, wathi:

¹⁰ “Abantu ababili benyukela ethempelini ukuyokhuleka, omunye engumFarisi, omunye engumthelisi.

¹¹ UmFarisi wema, wakhuleka wathi: ‘Nkulunkulu, ngiyakubonga ngokuba ngingenjengabo abanye abantu: izigebengu, izikhohlakali, iziphingi, nanjengalo mthelisi.

¹² Ngizila ukudla kabili ngeviki, nginikela ngokweshumi kwakho konke engikutholayo.’

¹³ “Kepha umthelisi wema kude engafuni ngisho nokuphakamisela amehlo akhe ngasezulwini, kodwa wazithoba ezisola, ethi: ‘Nkulunkulu, ngihawukele mina soni.’

¹⁴ “Ngithi kini: lo wabuyela ekhaya elungisisiwe kunomFarisi. Ngokuba yilowo nalowo oziphakamisayo, uzakuthotshiswa; kodwa ozithobayo, uzakuphakanyiswa.”

UJesu Ubusisa Abantwana

¹⁵ Baletha futhi kuJesu abantwana ukuba abaphathe; kodwa abafundi bekubona lokho, babakhuza.

¹⁶ Kepha uJesu wababiza, ethi: “Vumelani abantwana beze kimi, ningabenqabeli, ngokuba umbuso kaNkulunkulu ungowabanje.

¹⁷ Ngiqinisile ngithi kini: yilowo nalowo ongawemukeli umbuso kaNkulunkulu njengomntwana, kasoze angena kuwo.”

Umbusi Onothileyo

¹⁸ Umbusi othile wayesembuza, ethi: “Mfundisi omuhle, ngiyakwenzenjani ukuze ngidle ifa lokuphila okuphakade na?”

¹⁹ Kepha uJesu wathi kuye: “Ungibizelani ngokuthi ngimuhle na? Akekho omuhle, kuphela, uNkulunkulu.

²⁰ Uyayazi imiyalelo ethi: ‘Ungaphingi, ungabulali, ungebi, ungafakazi amanga, hlonipha uyihlo nonyoko.’ ”

²¹ Kepha yena wathi: “Konke lokho ngikugcinile kusukela ebusheni bami.”

²² Esekuzwile lokho, uJesu wathi kuye: “Kunye kuphela okusakusalele: thengisa ngakho konke onakho, uphe abampofu, khona-ke uzakuba nengcebo ezulwini, bese uza, ungilandele.”

²³ Kuthe ekuzwa lokho, waphatheka kabi, ngokuba wayecebe kakhulu.

²⁴ UJesu embona ukuthi ulimele kakhulu, wathi: “Kulukhuni kuyitshe kwabanothileyo ukuba bangene embusweni kaNkulunkulu.

²⁵ Kulula ukuba ikameli lingene ngembobo yosungulo, kunokuba onothileyo angene embusweni kaNkulunkulu.”

²⁶ Abakuzwayo lokho base bethi: “Pho kuyakusindiswa bani na?”

²⁷ Kepha uJesu wathi kubo: “Okungenzeki kubantu, kungenzeka kuNkulunkulu.”

Umvuzo Wokuzidela

²⁸ UPhethro wayesethi: “Thina sishiye okungokwethu, sakulandela.”

²⁹ UJesu wathi kubo: “Ngiqinisile ngithi kini: akukho muntu oshiye indlu, noma umkakhe, noma abafowabo, noma abazali, noma abantwana, ngenxa yombuso kaNkulunkulu,

³⁰ ongayukukwamukeliswa okuphindwe kaningi kulesi sikhathi, esikhathini esizayo, ukuphila okuphakade.”

UJesu Ukhuluma Okwesithathu Ngokuhlupheka Kwakhe

³¹ Wabasondeza kuye abali-12, wathi kubo: “Lalelani, sikhuphukela eJerusalema; konke okulotshwe ngabaphrofethi maqondana neNdodana yomuntu, kuzakugcwaliseka.

³² Izakukhashelwa kwabezizwe, iklolodelwe, iphathwe kabi, ikhafulelwe ngamathe,

³³ bayishaye, bayibulale; kodwa ngosuku lwesithathu, izakuvuka.”

³⁴ Kepha abakuqondanga lokho; leli lizwi laliyimpicabadala kubo, abakuqondanga lokho akushoyo.

UJesu Uvula Amehlo Empumputhe

³⁵ Kwathi esesondela eJerikho, impumputhe ethile yayihleli ngasendleleni inqiba.

³⁶ Kuthe lapho izwa isixuku sidlula ngakuyo, yabuza yathi: “Ngabe kuyini lokhu na?”

³⁷ Base beyitshela bathi: “NguJesu waseNazaretha owedlulayo.”

³⁸ Yayisimemeza ithi: “Jesu, Ndodana kaDavide, ngihawukele!”

³⁹ Ababehamba ngaphambili bayikhuza ukuba ithule, kodwa kwayilapho isho kakhulu ngengila, ithi: “Ndodana kaDavide, ngihawukele!”

⁴⁰ UJesu wema, wabayala ukuba bayilethe kuye. Kuthe isisondele wayibuza wathi:

⁴¹ “Ufuna ukuba ngikwenzeleni na?” Yathi: “Nkosi, ukuba ngibuye ngibone.”

⁴² UJesu wathi kuyo: “Bona! Ukukholwa kwakho kukusindisile.”

⁴³ Yayisibona khona manjalo, yamlandela imdumisa uNkulunkulu, nabantu bonke bekubona lokho bamdumisa uNkulunkulu.