Mathewu 9 - IsiZulu 2020

UJesu Uphilisa Umuntu Ofe Uhlangothi

¹ UJesu wangena esikebheni, wawelela ngaphesheya, waya emzini wakubo.

² Base beletha kuye umuntu ofe uhlangothi, elele ohlakeni. UJesu ebona ukukholwa kwabo, wathi kofe uhlangothi: “Yima isibindi, ndodana, uthethelelwe izono zakho.”

³ Abathile kuzazimthetho bakhuluma bodwa, bathi: “Lo muntu uyahlambalaza.”

⁴ UJesu eyazi imidlinzo yabo, wathi: “Yini nidlinze okubi ezinhliziyweni zenu na?

⁵ Ngokuba yikuphi okulula phakathi kokuthi: ‘Uthethelelwe izono zakho,’ nokuthi: ‘Vuka uhambe’ na?

⁶ Kepha ukuze nazi ukuthi iNdodana yomuntu inegunya lokuthethelela izono emhlabeni ...,” wathi kofe uhlangothi: “Vuka, uthathe uhlaka lwakho, uye endlini yakho.”

⁷ Wavuka, waya endlini yakhe.

⁸ Izixuku zikubona lokho zethuka, zamdumisa uNkulunkulu onike abantu igunya elinjalo.

Ukubizwa KukaMathewu

⁹ Kuthe uJesu edlula lapho, wabona umuntu okuthiwa nguMathewu ehleli endaweni yokuthelisa, wathi kuye: “Ngilandele.” Wasuka-ke wamlandela.

¹⁰ Kwathi uJesu ehleli esidlweni endlini, kwase kufika abathelisi abaningi nezoni, bahlala, badla naye nabafundi bakhe.

¹¹ AbaFarisi, bekubona lokho, bathi kubafundi bakhe: “Kwenziwa yini ukuba umfundisi wenu adle nabathelisi nezoni na?”

¹² Kwathi lapho ekuzwa lokho, wathi: “Abaphilileyo abayidingi inyanga, kodwa ngabagulayo kuphela.

¹³ Ngakho-ke hambani nifunde ukuthi kusho ukuthini ukuthi: ‘Ngifuna isihawu, hhayi umhlatshelo.’ Ngokuba angizanga ukuzobiza abalungileyo, kodwa izoni.”

Umbuzo Ngokuzila Ukudla

¹⁴ Khona kwafika kuJesu abafundi bakaJohane, bathi: “Kungani thina nabaFarisi sizila ukudla, kodwa abafundi bakho bengazili na?”

¹⁵ UJesu wathi kubo: “Ikhetho lingalila yini umyeni esenalo na? Kepha ziyeza izinsuku lapho umyeni eyakususwa kulo; kulapho-ke lizakuzila khona.

¹⁶ Akekho ochibiyela ngendwangu entsha engutsheni endala, ngokuba isichibi sizoyiklebhuka ingubo endala, bese imbobo yanda kakhulu.

¹⁷ Newayini elisha alithelwa ezimvabeni ezindala, funa izimvaba zidabuke, lichitheke iwayini, nezimvaba zonakale. Kepha iwayini elisha balithela ezimvabeni ezintsha, kokubili kulondeke.”

Ukuvuswa Kwendodakazi KaJayiru Nokuphulukiswa Kowesifazane

¹⁸ Esakhuluma lokho kubo; kwafika umphathi othile, wakhuleka kuye, wathi: “Indodakazi yami isanda kufa khona manje, kodwa woza, ubeke isandla sakho phezu kwayo, izakuphila.”

¹⁹ UJesu wayesesuka-ke, wamlandela, ekanye nabafundi bakhe.

²⁰ Kwakukhona owesifazane owayenesifo somopho iminyaka eli-12, wasondela emuva kukaJesu, wathinta umphetho wengubo yakhe.

²¹ Ngokuba wayezindla, ethi: “Uma nje ngingathinta ingubo yakhe, ngizakusindiswa.”

²² UJesu waphenduka, wambona, wathi: “Yima isibindi, ndodakazi; ukukholwa kwakho kukusindisile.” Owesifazane wasinda ngaleso sikhathi.

²³ UJesu esefikile endlini yomphathi, ebona khona ababethi bemitshingo nesixuku esethukile,

²⁴ wathi kubo: “Dedani, ngokuba intombazane ayifile, kodwa ilele.” Bamhleka usulu.

²⁵ Kuthe isixuku sesikhishiwe, wangena, wayibamba ngesandla; yavuka intombazana.

²⁶ Umbiko ngalokhu wasabalala kulo lonke lelo lizwe.

UJesu Uvula Amehlo Ezimpumputhe Ezimbili

²⁷ Ngenkathi uJesu edlula lapho, walandelwa yizimpumputhe ezimbili ezazimemeza zithi: “Ndodana kaDavide, sihawukele!”

²⁸ Esefikile endlini, izimpumputhe zeza kuye. UJesu wathi kuzo: “Niyakholwa yini ukuthi ngingakwenza lokhu na?” Zathi kuye: “Yebo, Nkosi.”

²⁹ Wayesethinta amehlo azo, wathi: “Makwenzeke kini njengokukholwa kwenu.”

³⁰ Ayesevuleka amehlo azo. UJesu wazidonsa ngendlebe, wathi: “Qaphelani ukuba lokhu kungaziwa muntu.”

³¹ Kepha zathi ziphuma nje, zamdumisa kulo lonke lelo lizwe.

³² Ngesikhathi ziphuma, kwalethwa kuye umuntu oyisimungulu enamadimoni.

³³ Kuthe selikhishiwe idimoni, isimungulu sakhuluma. Izixuku zamangala, zathi: “Hawu, akukaze kubonwe okunje kwa-Israyeli!”

³⁴ Kepha abaFarisi, bathi: “Ukhipha amadimoni ngombusi wamadimoni.”

Isivuno Esikhulu Nezisebenzi Eziyingcosana

³⁵ UJesu wahamba imizi yonke nemizana efundisa emasinagogeni abo, eshumayela ivangeli lombuso, ephulukisa bonke abanezifo ezahlukene, nokugula konke.

³⁶ Kwathi lapho ebona izixuku, waba nesihe ngazo, ngokuba zazikhathazekile, zithithibele njengezimvu ezingenamalusi.

³⁷ Wayesethi kubafundi bakhe: “Isivuno sikhulu, kodwa izisebenzi ziyingcosana.

³⁸ Ngakho-ke nxusani iNkosi yokuvuna ukuba ithume izisebenzi, ziye ekuvuneni kwayo.”