Mathewu 8 - IsiZulu 2020

UJesu Uphilisa Umuntu Onochoko

¹ Kwathi lapho uJesu ehla entabeni, walandelwa yizixuku eziningi.

² Kwase kuza umuntu onochoko, wakhuleka kuye, wathi: “Nkosi, uma uthanda, ungangihlambulula.”

³ UJesu welula isandla sakhe, wamthinta, wathi: “Ngiyathanda; hlambuluka.” Wayesehlambuluka ngokushesha ochokweni lwakhe.

⁴ UJesu wayesethi kuye: “Qaphela, ungatsheli muntu, kepha hamba uyozibonakalisa kumphristi, unikele ngomnikelo owayalelwa nguMose, kube ngubufakazi kubo.”

Ukuphulukiswa Kwenceku Yenduna

⁵ Kwathi lapho uJesu engena eKhaphernawume, kweza kuye induna yekhulu, yamnxusa,

⁶ yathi: “Nkosi, umfana wami ulele endlini, ufe uhlangothi; usezinhlungwini ezinzima.”

⁷ UJesu wayesethi kuyo: “Mina ngizakuza ngimphulukise.”

⁸ Kepha induna yekhulu yaphendula yathi: “Nkosi, angifanele ukuba ungangena phansi kophahla lwami, kodwa khipha izwi nje, khona umfana wami uyakusinda.

⁹ Ngokuba nami ngingumuntu ophansi komthetho, nginamabutho phansi kwami; ngithi kwelinye: ‘Hamba,’ lihambe; ngithi kwelinye: ‘Woza,’ lize; nasencekwini yami ngithi: ‘Yenza lokhu,’ ikwenze.”

¹⁰ UJesu ekuzwa lokhu wamangala, wayesethi kwababemlandela: “Ngiqinisile ngithi kini: angikaze ngikufumane kumuntu ukukholwa okungaka kwa-Israyeli.

¹¹ Kepha ngithi kini: baningi abayakuza bevela empumalanga nasentshonalanga, bahlale, badle no-Abhrahama no-Isaka noJakobe embusweni wezulu.

¹² Kepha abantwana bombuso bayakukhishelwa ngaphandle ebumnyameni obungayiwa; lapho kuyakuba khona ukukhala nokugedla amazinyo.”

¹³ UJesu wayesethi enduneni yekhulu: “Hamba, makwenzeke kuwe njengokukholwa kwakho.” Umfana wasinda ngalo lelo hora.

Ukuphulukiswa Komkhwekazi KaPhethro Nabanye Abagulayo

¹⁴ UJesu wayesengena endlini kaPhethro, wabona umkhwekazi kaPhethro elele phansi, enomkhuhlane.

¹⁵ Wathinta isandla sakhe, umkhuhlane waphela; wayesevuka, wamkhonza.

¹⁶ Kwathi kusihlwa, baletha kuye abaningi abanamadimoni, wabakhipha omoya ngezwi, wabaphulukisa bonke abagulayo,

¹⁷ ukuze kugcwaliseke okwakhulunywa ngo-Isaya umphrofethi, ukuthi: “Yena wabetshatha ubuthakathaka bethu, wazithwala izifo zethu.”

Ukumlandela UJesu

¹⁸ UJesu ebona isixuku simzungezile, wayala ukuba kuwelelwe ngaphesheya.

¹⁹ Esinye isazimthetho seza kuye, sathi: “Mfundisi, ngizakukulandela, nomaphi lapho uya khona.”

²⁰ UJesu wayesethi kuso: “Izimpungushe zinemigodi, nezinyoni zezulu zinezidleke, kodwa iNdodana yomuntu kayinandawo lapho ingacamelisa khona ikhanda.”

²¹ Kepha omunye wabafundi bakhe wathi kuye: “Nkosi, ngivumele ngihambe ngiyombela ubaba kuqala.”

²² Kepha uJesu wathi kuye: “Ngilandele, yekela abafileyo bambele abafileyo babo.”

UJesu Uthulisa Isivunguvungu

²³ UJesu wayesengena esikebheni, abafundi bakhe bamlandela.

²⁴ Nakho-ke sekuvuka isiphepho esikhulu olwandle, isikebhe saze sambozwa ngamagagasi, kodwa uJesu wayelele.

²⁵ Basondela, bamvusa, bethi: “Nkosi, sisindise, siyabhubha.”

²⁶ UJesu wayesethi kubo: “Yini nesabe kangaka, nina eninokukholwa okuncane na?” Wavuka wayesewukhuza umoya nolwandle, kwaba nokuthula okukhulu.

²⁷ Abantu bamangala, bathi: “Unhloboni lo muntu olalelwa umoya nolwandle na?”

UJesu Ukhipha Amadimoni

²⁸ Kwathi esefikile ngaphesheya ezweni lamaGadara, wahlangana nabantu ababili abanamadimoni, bephuma emathuneni. Babeyingozi kakhulu kangangokuthi kwakungekho muntu owayengalokotha adlule ngaleyo ndlela.

²⁹ Bezwakala sebememeza bethi: “Ufunani kithi Ndodana kaNkulunkulu na? Uze lapha ukuzosizwisa ubuhlungu, kungakabi yisikhathi na?”

³⁰ Kwakukhona buqamama umhlambi omkhulu wezingulube, ziklabile.

³¹ Amadimoni amncenga, athi: “Uma usikhipha, sithumele singene emhlanjini wezingulube.”

³² UJesu wathi kuwo: “Hambani.” Ayesephuma, angena ezingulubeni. Bheka, umhlambi wonke wakhalakathela esiweni, waphonseka olwandle, wafela emanzini.

³³ Ababezelusile babaleka, baya emzini, babika konke okwakwenzekile, nalokho okwakwenzeke kwabanamadimoni.

³⁴ Umuzi wonke waphuma ukuyobona uJesu; kwathi lapho bembona, bamncenga ukuba aphume aphele emingceleni yakwelakubo.