Mathewu 26 - IsiZulu 2020

Ukwakhiwa Kozungu Lokubamba Nokubulala UJesu

¹ Kwathi lapho uJesu eseqedile ukusho wonke lawo mazwi, wathi kubafundi bakhe:

² “Niyazi ukuthi emuva kwezinsuku ezimbili kuzakuba yiPhasika; iNdodana yomuntu izakukhashelwa ukuze ibethelwe esiphambanweni.”

³ Kwabuthana abaphristi abakhulu namalunga esizwe emzini womphristi omkhulu okuthiwa nguKhayifase.

⁴ Bakha uzungu lokuba bambambe uJesu ngobuqili, bambulale.

⁵ Kepha bathi: “Makungabi ngomkhosi, funa kube khona isiyaluyalu esizweni.”

UJesu Ugcotshwa EBhethaniya

⁶ Kuthe uJesu eseBhethaniya, endlini kaSimoni owayenochoko,

⁷ kwafika kuye owesifazane ephethe umfuma esitsheni se-alabhaste, owawungowenani elikhulu; wawuthela ekhanda likaJesu owayehleli esidlweni.

⁸ Kepha abafundi bakhe bekubona lokho, bathukuthela, bathi: “Kumoselwani lokhu na?

⁹ Ngokuba ngabe kuthengisiwe ngenani eliphezulu, kwaphiwa abampofu.”

¹⁰ Kepha uJesu ekwazi ababekusho, wathi kubo: “Nimhluphelani lo wesifazane na? Ngokuba wenze umsebenzi omuhle kimi.

¹¹ Ngokuba abampofu ninabo njalo, kodwa Mina aniyukuhlala ninami njalo.

¹² Ngokuba lo wesifazane, ngokuthela lawa mafutha emzimbeni wami, ukwenzele ukungilungisela ukumbelwa.

¹³ Ngiqinisile ngithi kini: noma kuphi lapho leli vangeli liyakushunyayelwa khona, emhlabeni wonke, kuyakukhulunywa nangalokhu akwenzile lo wesifazane, kube yisikhumbuzo ngaye.”

UJuda Iskariyothe Uvuma Ukukhaphela UJesu

¹⁴ Kwasuka omunye wabali-12, okuthiwa nguJuda Iskariyothe, waya kubaphristi abakhulu,

¹⁵ wathi: “Niyakunginika ini, uma ngimkhaphela kini na?” Base bemkalela, bamnika izinhlamvu zesiliva ezingama-30.

¹⁶ Kusukela ngaleso sikhathi, wafuna ithuba lokumkhaphela.

Ukumiswa Kwesidlo Esingcwele

¹⁷ Kwathi ngosuku lokuqala lwesinkwa esingenamvubelo, abafundi baya kuJesu, bathi: “Uthanda ukuba sikulungisele kuphi ukuba udle iPhasika na?”

¹⁸ Wathi: “Hambani niye emzini, kumuntu othile, nithi kuye: ‘Uthi uMfundisi: Isikhathi sami sesiseduze; ngizakwenza iPhasika kwakho nabafundi bami.’ ”

¹⁹ Abafundi benza njengalokhu uJesu ebayalile; balungisa iPhasika.

UJesu Ubikezela Ngokukhashelwa Kwakhe

²⁰ Sekuhlwile, ehlezi esidlweni nabafundi bakhe abali-12,

²¹ besadla, wathi: “Ngiqinisile ngithi kini: omunye wenu uzakungikhaphela.”

²² Baba lusizi kakhulu, baqala, kwaba yilowo nalowo wathi: “Ngabe yimi yini, Nkosi na?”

²³ Kepha waphendula, wathi: “Lowo ofake isandla kanye nami esitsheni, nguye ozakungikhaphela.

²⁴ Impela iNdodana yomuntu izakuhamba njengokulotshiwe ngayo, kodwa maye, kulowo muntu iNdodana yomuntu ekhashelwa ngaye! Bekuyakuba ngcono kulowo muntu ukuba akazalwanga.”

²⁵ Wayesebuza uJuda omkhaphelayo, wathi: “Kungaba yimi, Rabi na?” UJesu wathi kuye: “Usho khona.”

UJesu Udla Isidlo Nabafundi Bakhe

²⁶ Kuthe besadla, uJesu wathatha isinkwa, wasihlephula, wanika abafundi bakhe, wathi: “Thathani nidle, lokhu kungumzimba wami.”

²⁷ Wayesethatha indebe, wabonga, wabanika, wathi: “Phuzani kuyo, nina nonke;

²⁸ ngokuba lokhu kuyigazi lami lesivumelwano elithululwa ngenxa yabaningi ukuze kuthethelelwe izono.

²⁹ Kepha ngithi kini: Kusukela manje angisayukuphuza kulesi sithelo somvini, kuze kufike lolo suku engiyakusiphuza ngalo nani, sisisha, embusweni kaBaba.”

³⁰ Sebehlabelele iculo lokubonga, baphuma, baya eNtabeni Yeminqumo.

UJesu Ubikezela Ngokuphikwa NguPhethro

³¹ UJesu wathi kubo: “Nina nonke nizakukhubeka ngami ngalobu busuku, ngokuba kulotshiwe ukuthi: ‘Ngiyakushaya umalusi, izimvu zomhlambi zihlakazeke,’

³² kodwa emva kokuba sengivusiwe ngiyakunandulela ukuya eGalile.”

³³ UPhethro waphendula, wathi kuye: “Noma bonke bangakuhlamuka, mina angisoze ngakushiya.”

³⁴ UJesu wathi kuye: “Ngiqinisile ngithi kuwe: ngalobu busuku, ngaphambi kokuba iqhude likhale, uzakungiphika kathathu.”

³⁵ UPhethro wathi kuye: “Noma ngabe kufanele ukuba ngife nawe, angisoze ngakuphika.” Bonke abafundi basho kanjalo.

UJesu Ukhuleka EGetsemane

³⁶ UJesu wafika nabo endaweni okuthiwa yiGetsemane, wathi kubafundi bakhe: “Hlalani lapha, ngisayokhuleka laphaya.”

³⁷ Wathatha uPhethro namadodana amabili kaZebedewu, waqala ukuba nomunyu nosizi.

³⁸ Khona wathi kubo: “Umphefumulo wami ulusizi kakhulu, kuze kube sekufeni; hlalani lapha, nilinde kanye nami.”

³⁹ Waqhubeka ibangana, wawa ngobuso, wakhuleka wathi: “Baba, uma kungenzeka, mayedlule kimi le ndebe, kodwa kungabi njengokuthanda kwami, kube njengokuba uthanda wena.”

⁴⁰ Wabuyela kubafundi, wabafica belele, wathi kuPhethro: “Kodwa beningehlale nilinde nami ihora libe linye na?

⁴¹ Lindani, nikhuleke ukuze ningangeni ekulingweni; umoya uyavuma, kodwa umzimba ubuthakathaka.”

⁴² Wabuye wahamba okwesibili, wakhuleka wathi: “Baba, uma le ndebe ingenakudlula kimi ngingakayiphuzi, mayenziwe intando yakho.”

⁴³ Wabuyela kubo futhi, wabafumana belele, ngokuba amehlo abo ayegcwele ubuthongo.

⁴⁴ Wabuye wabashiya, wayokhuleka ngokwesithathu elokhu esho lona lelo lizwi.

⁴⁵ Wayesephindela kubafundi, wathi kubo: “Namanje nisalele, niphumule. Phela ihora selisondele; iNdodana yomuntu izakukhashelwa ezandleni zezoni.

⁴⁶ Sukumani sihambe; niyabona-ke, ongikhaphelayo useseduze.”

Ukuboshwa KukaJesu Nokuthethwa Kwecala Lakhe

⁴⁷ Kwathi esakhuluma; kwafika uJuda, omunye wabali-12, ehamba nesixuku sabantu esikhulu siphethe izinkemba nezinduku, sivela kubaphristi abakhulu namalunga esizwe.

⁴⁸ Omkhaphelayo wayebanike isibonakaliso, wathi: “Lowo engiyakumanga nguye; mbambeni.”

⁴⁹ Wayeseya kuJesu ngokushesha, wathi: “Rabi!” Wamanga.

⁵⁰ UJesu wayesethi kuye: “Mngani, yenza lokho oze ngakho.” Base besondela, bambamba uJesu.

⁵¹ Omunye walabo ababenoJesu wagqashula inkemba yakhe, wagenca inceku yomphristi omkhulu, wanquma indlebe yayo.

⁵² UJesu wathi kuye: “Buyisela inkemba yakho emgodleni wayo, ngokuba bonke abaphatha inkemba bayakubhubha ngenkemba.

⁵³ Ucabanga ukuthi bengingecele yini kuBaba angithumelele amaviyo ezingelosi angaphezu kwali-12 na?

⁵⁴ Pho-ke ingafezeka kanjani imibhalo ethi kufanele ukuba kwenzeke kanjalo na?”

⁵⁵ Ngaleso sikhathi uJesu wathi ezixukwini: “Niphume kungathi nize kumphangi, niphethe izinkemba nezinduku, nizongibamba na? Nsuku zonke bengifundisa ethempelini, kodwa anizange ningibambe.

⁵⁶ Kepha konke lokho kwenzekile ukuba kugcwaliseke imibhalo yabaphrofethi.” Khona bonke abafundi bamshiya babaleka.

UJesu Uyiswa KuKhayifase

⁵⁷ Labo ababembambile uJesu bamyisa kuKhayifase, umphristi omkhulu, lapho kwakubuthene khona izazimthetho namalunga.

⁵⁸ Kepha uPhethro wamlandela uJesu ebuqamama, kwaze kwaba segcekeni lomphristi omkhulu. Naye wangena ngaphakathi, wahlala phansi nezikhonzi ukuze abone isiphetho.

⁵⁹ Abaphristi abakhulu nomkhandlu wonke bafuna ubufakazi obungamanga ngoJesu, ukuze bambulale.

⁶⁰ Kepha ababutholanga, nakuba kwase kufike ofakazi abaningi bamanga. Kodwa kamuva kwavela ababili,

⁶¹ bathi: “Lo wathi: ‘Nginamandla okudiliza ithempeli likaNkulunkulu, ngibuye ngilakhe ngezinsuku ezintathu.’ ”

⁶² Kwase kusukuma umphristi omkhulu, wathi kuye: “Awuphenduli ngalutho kulokhu abakufakaza ngawe na?”

⁶³ Kepha uJesu wathula du. Umphristi omkhulu wayesethi kuye: “Ngikufungisa uNkulunkulu ophilayo ukuba usitshele uma unguKhristu, iNdodana kaNkulunkulu.”

⁶⁴ UJesu wayesethi kuye: “Usho khona. Nokho ngithi kini: kusukela manje niyakuyibona iNdodana yomuntu ihleli ngakwesokunene saMandla, iza ngamafu ezulu.”

⁶⁵ Umphristi omkhulu waklebhula izingubo zakhe, wathi: “Usehlambalazile; sisabadingelani ofakazi na? Nani senizizwele ngezindlebe zenu ehlambalaza.

⁶⁶ Pho nithini ngalokhu na?” Baphendula bathi: “Ufanelwe ngukufa.”

⁶⁷ Base bemkhafulela ngamathe ebusweni, bamdushuza, abanye bammukula,

⁶⁸ bathi: “Siphrofethele, Khristu; ngubani okushayileyo na?”

UPhethro Uphika UJesu

⁶⁹ UPhethro wayehleli phandle egcekeni, enye yamantombazane yeza kuye, yathi: “Nawe ubunoJesu waseGalile.”

⁷⁰ Kepha waphika phambi kwabo bonke, wathi: “Angazi ukuthi ukhuluma ngani.”

⁷¹ Esephumile esangweni, enye intombazane yambona, yathi kwababelapho: “Lona ubenoJesu waseNazaretha.”

⁷² Wafunga wagomela ephika futhi, ethi: “Angimazi lowo muntu.”

⁷³ Emva kwesikhashana, esesondele kwababemi lapho, bathi kuPhethro: “Impela nawe ungomunye wabo, udalulwa ngisho nangukukhuluma kwakho.”

⁷⁴ UPhethro waqala ukuqalekisa nokufunga, ethi: “Angimazi lowo muntu.” Masinyane, lakhala iqhude.

⁷⁵ UPhethro wayesekhumbula izwi abelishilo uJesu, lokuthi: “Iqhude lingakakhali, uzakube usungiphike kathathu.” Waphumela ngaphandle, wakhala kalusizi.