Mathewu 14 - IsiZulu 2020

Ukubulawa KukaJohane UMbhabhadisi

¹ Ngaleso sikhathi uHerode, uMthethraki, wezwa kubikwa ngoJesu,

² waseyesethi ezincekwini zakhe: “Lo nguJohane uMbhabhadisi, uvukile kwabafileyo, yingakho-ke lawa mandla esebenza kuye nje.”

³ Ngokuba nguye uHerode owayebambe uJohane, wamfaka ejele ngenxa kaHerodiya, umkaFiliphu, umfowabo.

⁴ Lokhu uJohane wayesho kuye ukuthi: “Awuvunyelwe ukuba umthathe.”

⁵ Kwathi nakuba ayefuna ukumbulala, kodwa wesaba abantu ngokuba babethi ungumphrofethi.

⁶ Kepha ngosuku lokuzalwa kukaHerode, indodakazi kaHerodiya yasina phambi kwabo, yamjabulisa uHerode,

⁷ wayeseyethembisa ngokufunga ukuthi uyakuyinika lokho eyakukucela.

⁸ Kuthe eseyicebisile unina, yathi: “Ngiphe ngoqwembe ikhanda likaJohane, uMbhabhadisi.”

⁹ Lokho kwayephula umoya inkosi, kepha ngenxa yezifungo eyayizenzile, nangenxa yababehleli nayo esidlweni, yayaleza ukuba inikwe.

¹⁰ Yathumela, yamnquma uJohane ikhanda ejele.

¹¹ Ikhanda lakhe lalethwa ngoqwembe, lanikwa intombazane; yayisilinika unina.

¹² Kwafika abafundi bakaJohane basithatha isidumbu sakhe, basimbela, base beyobikela uJesu.

UJesu Usuthisa Amadoda Ayizinkulungwane Eziyisihlanu

¹³ Kwathi uJesu esekuzwile lokho, wasuka lapho ngesikebhe waya endaweni eyihlane, yedwa. Zithe ukuba izixuku zikuzwe lokho, zamlandela ngezinyawo, ziphuma emizini.

¹⁴ Waphuma esikebheni, wabona isixuku esikhulu; waba nesihe ngaso, waphulukisa abagulayo babo.

¹⁵ Kuthe selishonile, abafundi bakhe beza kuye, bathi: “Le ndawo iyihlane futhi nelanga selizilahle kunina; tshela izixuku zihambe ziye emizaneni, ziyozithengela ukudla.”

¹⁶ Kepha uJesu wathi kubo: “Akudingekile ukuba bahambe; bapheni nina ukudla.”

¹⁷ Bathi kuye: “Asinalutho lapha, kuphela izinkwa ezinhlanu nezinhlanzi ezimbili.”

¹⁸ Wayesethi: “Kuletheni lapha kimi.”

¹⁹ Wayeseyala izixuku ukuba zihlale phansi otshanini, wathatha izinkwa ezinhlanu nezinhlanzi ezimbili, wabheka ngasezulwini, wakubusisa, wakuhlephula, wakunika abafundi, baphakela izixuku.

²⁰ Badla bonke, basutha, babutha imvuthuluka eyayisele, yagcwala iziqabetho ezili-12.

²¹ Labo abadlayo kwakungamadoda abalelwa ezi-5 000, ngaphandle kwabesifazane nezingane.

UJesu Uhamba Phezu Kolwandle

²² Wabacindezela abafundi bakhe ukuba bangene esikebheni masinyane, bamendulele, baye ngaphesheya, ukuze ahlakaze izixuku.

²³ Esezihlakazile, wenyukela entabeni eyedwa eyokhuleka; kwasekuhlwile, futhi eyedwa lapho.

²⁴ Kepha isikebhe sasesiqhele ibanga ogwini, sishukunyiswa ngamaza, ngokuba umoya wawuphambana nabo.

²⁵ Kuthe ngomlindo wesine wobusuku uJesu weza kubo ehamba phezu kolwandle.

²⁶ Kepha abafundi sebembonile ehamba phezu kolwandle bashaywa wuvalo, bethi ngumungcwi; bakhala ngokwesaba.

²⁷ UJesu wakhuluma nabo ngokushesha, wathi: “Yimani isibindi; yiMina, ningesabi.”

²⁸ UPhethro wayesephendula, wathi kuye: “Nkosi, uma kunguwe ngempela, yisho ukuba ngize kuwe phezu kwamanzi.”

²⁹ UJesu wayesethi: “Woza.” UPhethro wehla-ke esikebheni, wahamba phezu kwamanzi, waya kuJesu.

³⁰ Kepha kuthe ebona umoya onamandla, wesaba; eseqala ukucwila wakhala wathi: “Nkosi, ngisindise!”

³¹ Masinyane uJesu welula isandla, wambamba, wathi kuye: “Wena onokukholwa okuncinyane, ungabazeleni na?”

³² Sebegibele esikebheni, umoya wathula.

³³ Ababesesikebheni bakhuleka kuye, bathi: “Ngempela uyiNdodana kaNkulunkulu.”

UJesu Uphilisa Abagulayo EGenezaretha

³⁴ Sebewelele ngaphesheya, bafika eGenezaretha.

³⁵ Kwathi ukuba amadoda akuleyo ndawo ambone, athumela izigijimi kulo lonke izwe; baletha kuye bonke abagulayo.

³⁶ Bamnxusa ukuba bathinte nje umphetho wengubo yakhe; bonke abawuthintayo baphiliswa.