KwabaseRoma 16 - IsiZulu 2020

UPawula Ukhonza Kubazalwane

¹ Ngiyamncoma kini udadewethu, uFoyibe, oyidikoni ebandleni laseKhenikhreya,

² ukuba nimamukele eNkosini njengokufanele abangcwele, nimsize kukho konke angahle akudinge kini, ngokuba ulusizo impela kwabaningi, ngisho nakimi imbala.

³ Khonzani kuPhriska no-Akhwila, izisebenzi, kanye nami kuKhristu uJesu,

⁴ abadela ukuphila kwabo ngenxa yokuphila kwami, akubongi mina kuphela kodwa namabandla onke abezizwe.

⁵ Khonzani nasebandleni elisendlini yabo naku-Efenethu, othandekayo kimi, owulibo lwabase-Asiya kuKhristu.

⁶ Khonzani kuMariya owanisebenzela kakhulu.

⁷ Nikhonze ku-Anidroniku noJuniya abayizihlobo zami, ababeyiziboshwa kanye nami, abaqavile kubaphostoli, nababekuKhristu ngaphambi kwami.

⁸ Khonzani ku-Amphiliyathu wami othandekayo eNkosini.

⁹ Nikhonze ku-Urbhanu, isisebenzi kanye nathi kuKhristu, nakuStakuwami othandekayo.

¹⁰ Khonzani ku-Aphele owethembekile kuKhristu. Nikhonze nakwabendlu ka-Aristobhulu.

¹¹ Khonzani kuHerodiyone, isihlobo sami, nakwabendlu kaNarkisu abaseNkosini.

¹² Khonzani koThrayifina noThrayifosa abasebenza nathi eNkosini. Khonzani kuPhersisi othandekayo, owasebenza kakhulu eNkosini.

¹³ Khonzani kuRufu okhethiweyo eNkosini, nakunina ongumame nakimi.

¹⁴ Nikhonze ku-Asinkirithu, uFilegu, uHerme, uPhathroba, uHerma nakubazalwane abakanye nabo.

¹⁵ Khonzani nakuFilologu, uJuliheya, uNerewu, nodadewabo, naku-Olimpa, nakwabangcwele bonke abakanye nabo.

¹⁶ Bingelelanani ngokwanga okungcwele. Ayakhonza onke amabandla kaKhristu.

UPawula Uxwayisa Ibandla

¹⁷ Ngiyanincenga, bazalwane, ukuba nibaqaphele abadala ukwahlukana nabaphazamisa imfundiso enafundiswa yona, nihlukane nabo,

¹⁸ ngokuba abanjalo abayizo izikhonzi zeNkosi yethu uKhristu, kepha bakhonza isisu sabo; kuthi ngamazwi ashelelayo nathophayo badukise izinhliziyo zabangenacala.

¹⁹ Ngokuba njengoba ukulalela kwenu kuzwakele kubo bonke, ngakho-ke ngiyathokoza ngani, kodwa ngithanda ukuba nihlakaniphe kokuhle, nibe ngabangahlakaniphile kokubi.

²⁰ Kepha uNkulunkulu wokuthula uzakumchoboza masinyane uSathane phansi kwezinyawo zenu. Umusa weNkosi yethu uKhristu mawube nani.

Isiphetho

²¹ Uyakhonza kini uThimothewu oyisisebenzi kanye nami, noLukhiyu, uJasoni noSosiphathru, izihlobo zami.

²² Mina, Therthiyu, olobe le ncwadi ngiyakhonza kini eNkosini.

²³ Uyakhonza kini uGayu ongingenise kwakhe, mina nebandla lonke. Uyakhonza kini u-Erastu, umphathisikhwama womuzi, noKwartu, umzalwane.

²⁴ Umusa weNkosi yethu uJesu Khristu mawube nani nonke. Amen.

²⁵ Manje, kuye onamandla okuniqinisa ngokwevangeli lami nangentshumayelo kaJesu Khristu, ngokwambulwa kwemfihlakalo eyayifihliwe kusukela ngezikhathi zaphakade.

²⁶ Kepha manje esibonakalisiwe ngemibhalo yabaphrofethi, ngokomyalo kaNkulunkulu ongunaphakade, yazisiwe ezizweni zonke, kube ngukulalela kokukholwa.

²⁷ Kuye uNkulunkulu, Yena yedwa onokwazi, makube kuye inkazimulo ngoJesu Khristu kuze kube phakade. Amen.