IzAga 9 - IsiZulu 2020

Ukuhlakanipha Nobuwula

¹ Ukuhlakanipha sekwakhe indlu yakho; kuzibazile izinsika zakho eziyisikhombisa.

² Kuhlabe umhlatshelo, kwavubela iwayini lakho, kwadeka netafula lakho.

³ Kuthume izintombi zakho, kuyamemeza emagqumeni aphakemeyo omuzi, kuthi:

⁴ “Ongenalwazi makaphambukele lapha;” nakulowo ongenangqondo, kuthi kuye:

⁵ “Wozani nidle isinkwa sami, niphuze iwayini engilivubeleyo.

⁶ Shiyani izinto zobuwula, niphile, nihambe ngendlela yokuqonda.

⁷ “Osola isedeleli uzibangela ukwethukwa, nothethisa isikhohlakali uziholela ukulimala.

⁸ Ungasithethisi isedeleli, funa sikuzonde; sola ohlakaniphileyo, uyakukuthanda.

⁹ Yala ohlakaniphileyo, uzohlakanipha kakhulu; ufundise olungileyo, uzothuthuka ngokuqonda.

¹⁰ “Ukuqala kokuhlakanipha kungukumesaba uSimakade, nokumazi oNgcwele kungukuqonda.

¹¹ Izinsuku zakho ziyokwanda ngami, kwenezelwe neminyaka yokuphila kwakho.

¹² Uma uhlakaniphile, uzihlakaniphele; uma wedelela, uyakukuthwala wena wedwa.”

¹³ Owesifazane oyisiwula unomsindo, uyisiwula, akazi lutho.

¹⁴ Uhlala ngasemnyango wendlu yakhe, esihlalweni esisendaweni ephakemeyo yomuzi,

¹⁵ ukuze ameme abedlula ngendlela, abaqondile emikhondweni yabo, athi:

¹⁶ “Ongenalwazi makaphambukele ngapha;” kulowo ongenangqondo, uthi kuye:

¹⁷ “Amanzi okwebiwa amnandi, nesinkwa esidlelwa esithe siyenamisa.”

¹⁸ Kepha ophambukayo akazi ukuthi kukhona izithunzi lapho, nokuthi izimenywa zakhe zisendleleni eya kwelabafileyo.