IzAga 7 - IsiZulu 2020

Isixwayiso Ngowesifazane Ophingayo

¹ Ndodana yami, gcina amazwi ami, uzilondele imiyalelo yami.

² Gcina imiyalelo yami, uphile, nemfundiso yami, njengenhlamvu yeso lakho.

³ Kubophele eminweni yakho, ukulobe esibhebheni senhliziyo yakho.

⁴ Yisho kukho ukuhlakanipha uthi: “Wena ungudadewethu,” ubize ukuqonda, ukubize ngokuthi yisihlobo sakho,

⁵ ukuze kukuvikele kowesifazane ondindayo, nakowezizwe onamazwi athophayo.

⁶ Ngisefasiteleni lendlu yami, ngalunguza ngekhethini lami,

⁷ ngabona phakathi kwabangenalwazi, ngabona phakathi kwabasha insizwa engenakuqonda,

⁸ idlula emgwaqweni eduze negumbi lakhe, ibheke ngasendlini yakhe;

⁹ kwasekuhwelela kusihlwa, esigayegayeni sobusuku nobumnyama.

¹⁰ Bheka, owesifazane wamhlangabeza egqokise okwesifebe, ezembozile.

¹¹ Uyaphishaphisheka akanakuthula; izinyawo zakhe azivumi ukuhlala endlini yakhe,

¹² manje usesemigwaqweni, nanguya esesezigcawini, uyacutha emajikeni wonke.

¹³ Uyayibamba, uyayiqabula, engenamahloni, uthi kuyo:

¹⁴ “Namuhla ngiyenzile iminikelo yokuthula; ngazigcwalisa izithembiso zami.

¹⁵ Ngakho-ke ngiphumile ngizokuhlangabeza, ngizofuna ubuso bakho, manje sengikutholile.

¹⁶ Umbhede wami wendlalwe ngezindwangu zokwemboza, nelineni laseGibhithe elinemishu.

¹⁷ Umbhede wami ngiwufafaze ngemure, ngenhlaba nangekinamona.

¹⁸ Woza sizanelise ngothando kuze kuse; sijabule ngokuthandana.

¹⁹ Indoda yami ayikho ekhaya; ithathe uhambo olude.

²⁰ Ithathe isikhwama semali ngesandla; iyoze ibuye ekhaya ngokudilingana kwenyanga.”

²¹ Uyiphambukisa ngamazwi akhe amaningi ahehayo; uyiyenga ngokuthopha kwezindebe zakhe.

²² Iyamlandela masinyane njengenkabi iya ekuhlatshweni nanjengenyamazane ingena esihibeni;

²³ uze umcibisholo uhlabe esibindini sayo; isheshela ogibeni njengenyoni, ingazi ukuthi lubekelwe ukuphila kwayo.

²⁴ Ngakho-ke bantwana, ngizweni, nilalele amazwi aphuma emlonyeni wami.

²⁵ Inhliziyo yakho mayingaphambukeli ezindleleni zakhe, ungahambi emikhondweni yakhe.

²⁶ Ubawisile abaningi, bafa; ubulele izindimbane.

²⁷ Indlu yakhe iyindlela eqonde endaweni yabafileyo, eyehlela emakamelweni okufa.