AmaHubo 96 - IsiZulu 2020

Ukudunyiswa KukaNkulunkulu Yizizwe Zonke

¹ Hlabelelani uSimakade ihubo elisha, nimhlabelele uSimakade, mhlaba wonke.

² Mhubeleni uSimakade, nibonge igama lakhe, nimemezele insindiso yakhe imihla ngemihla.

³ Landani ngenkazimulo yakhe kwabezizwe, nezimangaliso zakhe kubantu bonke.

⁴ Mkhulu uSimakade, udumisekile kakhulu, uyesabeka ngaphezu konkulunkulu bonke.

⁵ Bonke onkulunkulu babezizwe bayizithombe, kodwa uSimakade wenza izulu.

⁶ Udumo nobukhosi kusebusweni bakhe, amandla nenkazimulo kusendlini yakhe engcwele.

⁷ Nina mindeni yabantu nikani uSimakade, mnikeni uSimakade inkazimulo namandla.

⁸ Mnikeni uSimakade inkazimulo yegama lakhe, nilethe umnikelo, ningene emagcekeni akhe.

⁹ Khulekani kuSimakade, nihlobe ngobungcwele, nithuthumele ebusweni bakhe, mhlaba wonke.

¹⁰ Shonini phakathi kwezizwe, nithi: “USimakade uyinkosi;” umhlaba umi uqinile, awunakunyakaziswa. Uyokwehlulela izizwe ngobuqotho.

¹¹ Malijabule izulu, umhlaba uthokoze, maluhlokome ulwandle, nakho konke okukulo.

¹² Mawethabe amasimu, nakho konke okukuwo, kwename imithi yonke yehlathi

¹³ phambi kukaSimakade, ngokuba uyeza, impela uyeza ukuzokwehlulela umhlaba. Uzowehlulela ngobuqotho umhlaba, nezizwe ngokwethembeka kwakhe.