AmaHubo 95 - IsiZulu 2020

Ukubonga Nokuhubela USimakade

¹ Wozani simhubele uSimakade, silihlokomele ngenjabulo idwala lensindiso yethu.

² Masize phambi kwakhe ngokubonga, simhubele amahubo.

³ Ngokuba uSimakade unguNkulunkulu omkhulu, uyiNkosi enkulu ngaphezu konkulunkulu bonke.

⁴ Esandleni sakhe kukhona izinzulu zomhlaba, neziqongo zezintaba ngezakhe nazo.

⁵ Ulwandle ngolwakhe, walwenza, nomhlabathi owomileyo wawubumba ngezandla zakhe.

⁶ Wozani sikhuleke, sikhothame, siguqe phambi kukaSimakade, uMenzi wethu.

⁷ Ngokuba Yena unguNkulunkulu wethu, thina singabantu bedlelo lakhe nezimvu zesandla sakhe.

⁸ Ningayenzi lukhuni inhliziyo yenu njengaseMeribha, njengasosukwini lwaseMasa, ehlane,

⁹ lapho okhokho benu bangilinga khona, bangivivinya, bewubonile umsebenzi wami.

¹⁰ Iminyaka engamashumi amane, nganengwa yileso sizukulwane, ngaze, ngathi: “Bangabantu abanhliziyo zabo zidukile, abangazazanga izindlela zami.”

¹¹ Ngafunga ngabo olakeni lwami, ngathi: “Abasoze bangena ekuphumuleni kwami.”