AmaHubo 84 - IsiZulu 2020

Izindlu ZikaSimakade Ziyathandeka

Kumholi wokuhlabelela. NgeGititi. Elamadodana kaKhora. Ihubo

¹ Wo, zithandeka kangaka izindlu zakho, Simakade Wamabandla!

² Umphefumulo wami ulangazelela, womela amagceke kaSimakade. Inhliziyo yami nomzimba wami kuhuba ngokwethaba kuNkulunkulu ophilayo.

³ Ngokuba inyoni ifumene isidleke, nenkonjane yazitholela isidleke sayo, lapho ingabeka khona amaphuphu ayo, ngisho kuma-althare akho, Simakade Wamabandla, Nkosi yami, Nkulunkulu wami.

⁴ Babusisiwe abahlala endlini yakho; bayakuhlala bebonga Wena. Sela

⁵ Ubusisiwe umuntu omandla akhe akuwe, abazindlela zakho zisezinhliziyweni zabo.

⁶ Bedabula esigodini iBhakha, basenza saba yindawo yeziphethu, nemvula yokuqala iyayisibekela ngezibusiso.

⁷ Baqhubeka emandleni, baze babonakale phambi kukaNkulunkulu eZiyoni.

⁸ Simakade Nkulunkulu Wamabandla, yizwa umkhuleko wami, ubeke indlebe, Nkulunkulu kaJakobe. Sela

⁹ Wena Nkulunkulu, Sihlangu sethu, bheka, ubuke ubuso bogcotshiweyo wakho.

¹⁰ Ngokuba usuku lulunye emagcekeni akho, luhle kunezinye eziyizinkulungwane. Ngiyakhetha ukulinda emnyango wendlu kaNkulunkulu wami, kunokuhlala emathendeni ezikhohlakali.

¹¹ Ngokuba uSimakade uNkulunkulu, uyilanga nesihlangu, uSimakade uyakupha umusa nodumo, akayukubenqabela okuhle abahamba ngobuqotho.

¹² Simakade Wamabandla, ubusisiwe okwethembayo.