AmaHubo 83 - IsiZulu 2020

Umkhuleko Wokuba Zichithwe Izitha Zika-Israyeli

Ihubo lika-Asafa

¹ Nkulunkulu, ungathuli, ungabi yisithulu, ungali ukukhuluma, Nkulunkulu.

² Ngokuba bheka, izitha zakho ziyaxokozela, nabakuzondayo bayakuvukela.

³ Ngobuqili, benza uzungu ngabantu bakho, baceba ukulwa nabafihliweyo bakho.

⁴ Bathi: “Wozani sibaqothule, bangabe besaba yisizwe, negama lika-Israyeli lingabe lisakhunjulwa.”

⁵ Baceba nganhliziyonye, benza isivumelwano ngawe:

⁶ amathende ka-Edomi aka-Ishmayeli, akaMowabi nakaHagari,

⁷ noGebhali, u-Amoni, u-Amaleki, iFilistiya nabakhile eThire.

⁸ Ne-Asiriya lahlangana nabo, laba yingalo yabantwana bakaLothi. Sela

⁹ Yenza kubo njengakuMidiyani, nakuSisera nakuJabhini ngasemfuleni iKishoni,

¹⁰ ababhubhela e-Eni Dori, baba ngumquba emhlabathini.

¹¹ Izikhulu zabo zenze zibe njengo-Orebhi noZebhi, nawo wonke amakhosana abo abe njengoZebha noZalimuna

¹² ababethi: “Masizithathele amadlelo kaNkulunkulu.”

¹³ Nkulunkulu wami, benze bafane nothuli lwesikhwishikazana, bafane namakhoba emoyeni.

¹⁴ Njengomlilo oshisa ihlathi, njengelangabi elithungela izintaba,

¹⁵ baxoshe kanjalo ngesivunguvungu sakho, ubethuse ngesiphepho sakho.

¹⁶ Ubuso babo ubuthele ngehlazo, baze bafune igama lakho, Simakade.

¹⁷ Mabahlazeke, baphele amandla kuze kube phakade, mabahluleke, babhubhe,

¹⁸ bazi ukuthi nguwe wedwa ogama lakho linguSimakade, ungoPhezukonke emhlabeni wonke.