AmaHubo 82 - IsiZulu 2020

UNkulunkulu Ungumehluleli Oqotho

Ihubo lika-Asafa

¹ UNkulunkulu umi emhlanganweni wonkulunkulu; uyehlulela phakathi konkulunkulu.

² Kuyoze kube nini nehlulela ngokungalungile, nenzelela izikhohlakali na? Sela

³ Yahlulelani ompofu nentandane, nimenzele okufaneleyo olusizi nontulayo.

⁴ Khululani ontulayo nompofu, nibophule esandleni sezikhohlakali.

⁵ Kabanakwazi nakuqonda, badukuza ebumnyameni; zonke izisekelo zomhlaba ziyazamazama.

⁶ Mina ngathi: “Ningonkulunkulu nina, nonke ningamadodana oPhezukonke.

⁷ Kanti nokho niyakufa njengabantu nje, niwe njengesinye sezikhulu.”

⁸ Vuka, Nkulunkulu, wehlulele umhlaba, ngokuba Wena uyindlalifa yezizwe zonke.