AmaHubo 65 - IsiZulu 2020

Ukubonga Izipho ZikaNkulunkulu

Kumholi wokuhlabelela. Ihubo likaDavide

¹ Udumo lufanele Wena, Nkulunkulu, eZiyoni kuyofezeka isithembiso kuwe.

² Wena oyizwayo imikhuleko, bonke abantu beza kuwe.

³ Iziphambeko zingigabhile, uyazithethelela iziphambeko zethu.

⁴ Ubusisiwe okhethwe nguwe, wamsondeza ukuba ahlale emagcekeni akho. Siyosuthiswa ngokuhle okuvela endlini yakho, ithempeli lakho elingcwele.

⁵ Uyakusiphendula ngezenzo ezesabekayo ekulungeni, Nkulunkulu wensindiso yethu. Wena uyithemba lemikhawulo yonke yomhlaba nelolwandle olukude,

⁶ Yena omisa izintaba ngamandla akhe, obhince amandla,

⁷ othulisa ukuduma kwezilwandle, inhlokomo yamaza azo nomsindo wabantu.

⁸ Abakhile emikhawulweni yomhlaba bayesaba ngezibonakaliso zakho, ujabulisa impumalanga nentshonalanga.

⁹ Uhambela umhlaba, unisa imvula, uwuvundisa kakhulu, umfula kaNkulunkulu ugcwele amanzi, abantu ubalungisela ukudla.

¹⁰ Umatisa imisele yawo, ulalise amasoyi awo, uwuthambise ngezihlambi, ubusise okumila kuwo.

¹¹ Unyaka uwuhlobisa ngobumnene bakho, imikhondo yakho iconsa amafutha.

¹² Amadlelo asehlane ayaconsa, amagquma abhinca injabulo.

¹³ Amadlelo embethe izimvu, nezigodi zisibekelwe ngokusanhlamvu, konke kuyajabula, kuyahlabelela.