AmaHubo 60 - IsiZulu 2020

Umkhuleko Wocela Ukusizwa Ezitheni

Kumholi wokuhlabelela. Indlela: umnduze; ubufakazi. IMiktamu likaDavide, ekulweni kwakhe nama-Aramu naharayimi nama-Aramu Zoba, uJowabe ebuya, enqoba abakwa-Edomi eSigodini Sikasawoti abayizi-12 000

¹ Nkulunkulu usilahlile, usibhubhisile, ngoba usithukuthelele; ake usivuselele futhi.

² Uwuzamazamisile umhlaba, wawuqhekeza, zivale izimfa zawo, ngokuba uyazamazama.

³ Isizwe sakho usibonisile izinto ezinzima, wasiphuzisa iwayini, sadiyazela.

⁴ Abakwesabayo ubanike ifulegi ukuba baliphakamise ngenxa yeqiniso. Sela

⁵ Ukuze abathandekayo bakho bakhululwe, sindisa ngesandla sakho sokunene, usiphendule.

⁶ UNkulunkulu ukhulumile esebungcweleni bakhe, wathi: “Ngizokunqoba, ngihlukanise iShekemi, ngisilinganise iSigodi iSukhothi.

⁷ UGileyadi noManase bangabami, u-Efrayimi uyisivikelo sekhanda lami, uJuda uyintonga yami yokubusa.

⁸ UMowabi uyisitsha sami sokuhlambela, ngiphonsa isicathulo sami phezu kuka-Edomi. Filistiya, hlokoma ngenjabulo ngenxa yami.”

⁹ Ngubani oyakungiyisa emzini oqinileyo na? Ngubani oyakungiholela kwa-Edomi na?

¹⁰ Nkulunkulu, akuWena yini osilahlileyo na? Awusaphumi namabutho ethu, Nkulunkulu.

¹¹ Sisize esitheni, ngokuba ukuhlenga kwabantu kuyize.

¹² Sizonqoba ngoNkulunkulu; Yena uzozinyathela izitha zethu.