AmaHubo 59 - IsiZulu 2020

Umkhuleko Wocela Ukukhululwa Ezitheni

Kumholi wokuhlabelela. Indlela: ungachithi. ElikaDavide. IMiktamu, mhla uSawule ethumela, ethi mabayilinde indlu ukuba bambulale

¹ Nkulunkulu wami, ngikhulule ezitheni zami, ungivikele kwabangivukelayo.

² Ngikhulule kwabenza okubi, ungisindise kubantu abomele igazi.

³ Ngokuba, bheka, baqamekela impilo yami, iziqhwaga ziyangihlanganyela, kungekho siphambeko nasono kimi, Simakade.

⁴ Ziyagijima, zizilungisele, ngingenacala, vuka ungihlangabeze, uzibonele ngawakho.

⁵ Wena, Simakade Nkulunkulu Wamabandla, Nkulunkulu ka-Israyeli, vuka ujezise zonke izizwe, ungahawukeli namunye kwabahlubukileyo. Sela

⁶ Babuya kusihlwa, bahlabe umkhulungwane njengenja, bezulazula emzini.

⁷ Bheka, bayakhafula ngemilomo yabo, amazwi abo ayizinkemba ezindebeni zabo, ngokuba bathi: “Ngubani ozwayo na?”

⁸ Kepha Wena Simakade uyabahleka, ubaklolodele bonke abezizwe.

⁹ Ngenxa yamandla akho, ngizokulindela, ngokuba uNkulunkulu uyinqaba yami.

¹⁰ UNkulunkulu wami uzongihlangabeza ngomusa wakhe; uNkulunkulu uzongibonisa izitha zami zinqotshwa.

¹¹ Ungazibulali, funa abantu bakithi bakhohlwe, kodwa zihlakaze ngamandla akho, uziqumbe phansi, Nkosi, sihlangu sethu.

¹² Amazwi eziwasho ngezindebe zazo ayisono esiphuma emlonyeni wazo, mazibambeke ekuqhosheni kwazo, nangenxa yesiqalekiso namanga eziwakhulumayo.

¹³ Ziqede nya, ngolaka, uzishabalalise ziphele nya, mazazi ukuthi nguNkulunkulu obusa kwaJakobe, kuze kube semikhawulweni yomhlaba. Sela

¹⁴ Zibuya kusihlwa, zihlabe umkhulungwane njengenja, zizulazule emzini.

¹⁵ Zehla zenyuka zifuna ukudla; uma zingasuthi, ziyagwavuma.

¹⁶ Kepha mina ngizakuhlabelela ngamandla akho, ngithabele umusa wakho ekuseni, ngokuba uyinqaba yami nesiphephelo sami ngosuku lokuhlupheka kwami.

¹⁷ Mandla ami, ngizohubela Wena; ngokuba uNkulunkulu, uyinqaba yami, unguNkulunkulu wami onomusa.