AmaHubo 58 - IsiZulu 2020

Umkhuleko Wocela Ukujeziswa Kwababi

Kumholi wokuhlabelela. Indlela: ungachithi. ElikaDavide. IMikthamu

¹ Kungabe impela nikhuluma ukulunga nobuqotho na? Madodana abantu, ngabe nehlulela ngobuqotho na?

² Qha, ingani ezinhliziyweni niphehla imisebenzi yokungalungi, ezweni nikala ngendluzula evela ezandleni zenu.

³ Ababi bahlubuka kwasesibelethweni, abaqamba amanga baduka kwasesiswini.

⁴ Isihlungu sabo sinjengesihlungu senyoka, banjengemamba edlebelekile, esivale amadlebe

⁵ ukuze ingalizwa izwi labalumbi abalumba ngobuchule.

⁶ Nkulunkulu, yephula amazinyo abo emilonyeni yabo. Simakade, phohloza amazinyo emihlathi yamabhongo ezingonyama.

⁷ Mabahwamuke njengamanzi achithekayo; lapho ekhomba ngemicibisholo yakhe, mayibe sengathi inqundekile.

⁸ Mababe njengomnenke oncibilika uphele, njengokuphuphume kowesifazane, okungalibonanga ilanga.

⁹ Amabhodwe enu engakakuzweli ukushisa kwezinkuni zameva, uyakuziphephula, noma ziluhlaza, noma zivutha.

¹⁰ Olungileyo uyojabula uma ebona impindiselo, uyogeza izinyawo zakhe egazini lababi,

¹¹ abantu baze bathi: “Impela ukhona umvuzo wolungileyo; impela ukhona uNkulunkulu owehlulelayo emhlabeni.”