AmaHubo 57 - IsiZulu 2020

Umkhuleko Wocela Ukuvikelwa Ezitheni

Kumholi wokuhlabelela. Indlela: ungachithi. ElikaDavide. IMiktamu, mhla ebalekela uSawule emphandwini

¹ Yiba nomusa kimi, Nkulunkulu, ngihawukele. Ngokuba umphefumulo wami uphephela kuwe. Ngizokhosela emthunzini wamaphiko akho, zize zedlule izinhlekelele.

² Ngizokhala kuNkulunkulu oPhezukonke, kuNkulunkulu ongiphindiselelayo.

³ Uzothumela esezulwini, angisindise. Uyamsola ofuna ukungifihliza. Sela UNkulunkulu uzothumela umusa wakhe neqiniso lakhe.

⁴ Umphefumulo wami uphakathi kwamabhubesi, ngilele phakathi kwabakhafula umlilo, ngisho nabantwana babantu, abamazinyo ayimikhonto nemicibisholo, abalulimi luyinkemba ebukhali.

⁵ Phakama, Nkulunkulu phezu kwezulu, inkazimulo yakho ibe phezu komhlaba wonke.

⁶ Izinyathelo zami bazicuphe ngogibe, umphefumulo wami udangele, bangimbele umgodi, kwakhalakathela bona kuwo. Sela

⁷ Inhliziyo yami yethabile, Nkulunkulu, inhliziyo yami igxilile. Ngizohlabelela, ngihube.

⁸ Vuka mphefumulo wami, vukani lugubhu nehabhu! Ngizovusa intathakusa.

⁹ Nkosi ngizokubonga phakathi kwabantu, ngikuhashe phakathi kwezizwe.

¹⁰ Ngokuba umusa wakho mkhulu, kuze kube sezulwini, nokwethembeka kwakho, kuze kube semafini.

¹¹ Phakama, Nkulunkulu, phezu kwezulu, inkazimulo yakho ibe phezu komhlaba wonke.