AmaHubo 52 - IsiZulu 2020

Ukuziqhayisa Kwesiqhwaga Nomusa KaNkulunkulu

Kumholi wokuhlabelela. IMaskili likaDavide ekufikeni kukaDowegi wakwa-Edomi emazisa uSawule, ethi kuye: “UDavide ufikile endlini ka-Ahimeleki”

¹ We siqhwaga, uziqhayiselani ngokubi na? Umusa kaNkulunkulu umi njalo.

² Ulimi lwakho luhlale lusongoza amacebo amabi, njengensingo ebukhali, wena menzi wobubi,

³ uthanda okubi kunokuhle, amanga kunokulungileyo. Sela

⁴ Wena lulimi lwenkohliso, uthanda onke amazwi abhubhisayo.

⁵ Kepha uNkulunkulu uzokuqumba phansi kuze kube phakade; uzokubamba, akukhiphe ethendeni lakho, akusiphule nasezweni labaphilayo. Sela

⁶ Abalungileyo bayokubona lokho, besabe; bakuhleke, bathi:

⁷ “Bheka, nasi isiqhwaga esingazange simenze uNkulunkulu abe yinqaba yaso, kodwa sethembela ebuningini bomcebo waso, sabambelela kakhulu ebubini baso.”

⁸ Kepha mina ngifana nesihlahla somhlwathi esiluhlaza, endlini kaNkulunkulu. Ngethembele emseni kaNkulunkulu kuze kube phakade.

⁹ Ngizokudumisa kuze kube phakade, ngokuba ukwenzile lokho. Ngizolindela igama lakho, ngokuba lihle phambi kwabathembekile bakho.