AmaHubo 49 - IsiZulu 2020

Ubuwula Bokwethemba Ingcebo

Kumholi wokuhlabelela. Elamadodana kaKhora. Ihubo

¹ Lalelani lokhu nina bantu, nonke bekani indlebe, nonke zakhamuzi zasemhlabeni,

² abantukazana nezikhulu, abacebileyo nabantulayo.

³ Umlomo wami uzokhuluma ukuhlakanipha, ukuzindla kwenhliziyo yami kuzokuba ngukuqonda.

⁴ Ngizakubeka indlebe yami kuso isaga, ngiphenye imfumbe yami ngehabhu.

⁵ Yini ebengizoyesaba ngesikhathi senhlupheko, lapho ngihaqwa wububi babangizingelayo,

⁶ labo abethembela engcebeni yabo, baqhoshe ngobuningi bomcebo wabo na?

⁷ Impela umuntu angemhlenge umfowabo, noma amhlawulele kuNkulunkulu.

⁸ Ngokuba ukuhlengwa kwempilo yakhe kubiza kakhulu, ngeke kwafinyelelwa kukho nanini,

⁹ ukuze umuntu aphile ingunaphakade, angaliboni igodi.

¹⁰ Qha, uyabona ukuthi abahlakaniphileyo bayafa, nokuthi isiwula nesiphukuphuku siyabhubha; umcebo wabo bawushiyele abanye.

¹¹ Ukucabanga kwabo kuthi izindlu zabo zizakuma kuze kube phakade, nemizi yabo, ezizukulwaneni ngezizukulwane; amazwe abo bawaqamba ngamagama abo.

¹² Kepha umuntu, nakuba enodumo, akayukuhlala angafi, ufana nezilwane ezibhubhayo.

¹³ Le ndlela yabo ingubuwula babo, balandelwa ngabathokozela amazwi abo. Sela

¹⁴ Baqhutshelwa endaweni yabafileyo njengezimvu, ukufa kuyakubelusa, ngakusasa abaqotho babusa phezu kwabo, isimo sabo siqedwe yindawo yabafileyo, bangabe besaba nandlu.

¹⁵ Kepha uNkulunkulu uyakuwukhulula umphefumulo wami esandleni sendawo yabafileyo, ngokuba uyakungamukela. Sela

¹⁶ Ungesabi uma umuntu eba yisicebi, nxa umcebo wendlu yakhe wanda.

¹⁷ Ngokuba ekufeni kwakhe akayukumuka nalutho, umcebo wakhe awuyukwehla naye.

¹⁸ Noma engawubusisa umphefumulo wakhe esaphila, futhi abantu bamtuse, ngokuba uzenzele kahle,

¹⁹ nokho uyakuya esizukulwaneni sokhokho bakhe, abayukukubona ukukhanya naphakade.

²⁰ Umuntu ebukhazikhazini bakhe engenakuqonda, unjengezilwane ezibhubhayo.