AmaHubo 32 - IsiZulu 2020

Ukuvuma Izono Nokuthethelelwa Kwazo

ElikaDavide. IMaskili

¹ Ubusisiwe umuntu osiphambeko sakhe sithethelelwe, osono sakhe sesuliwe.

² Ubusisiwe umuntu uSimakade angambaleli isiphambeko, okungekho nkohliso emoyeni wakhe.

³ Ngenkathi ngithule, amathambo ami awohloka ngenxa yokububula usuku lonke.

⁴ Isandla sakho sangicindezela kanzima ubusuku nemini, ngaphelelwa ngamandla, kwangathi ngihlaselwe wumoya weshisandlu. Sela

⁵ Ngase ngisivuma isono sami kuwe, angaze ngasifihla isiphambeko sami. Ngathi: “Ngizozivuma iziphambeko zami kuSimakade,” Yena wangithethelela icala lokona kwami.

⁶ Makuthi bonke abethembekileyo bakhuleke kuwe ngesikhathi senhlupheko; impela isikhukhula esinamandla asiyukufinyelela kubo.

⁷ Wena uyindawo yami yokubhaca, uyangivikela enkathazweni, ungiphahla ngenjabulo yokukhululwa. Sela

⁸ Ngizokubonisa, futhi ngikufundise indlela ozohamba ngayo; ngizobeka iso lami kuwe, ngikweluleke.

⁹ Ungafani nehhashi nomnyuzi okungenakuqonda, okukhalinywa ngetomu nomkhala ukuze kuhambe kuqonde, kungenjalo akuyukuwulalela umthetho wakho.

¹⁰ Ziningi izinhlupheko zababi, kodwa umusa uyamhaqa owethemba uSimakade.

¹¹ Yethabani kuSimakade nina abalungileyo; nihlokome ngentokozo nina nonke enimsulwa enhliziyweni.