AmaHubo 30 - IsiZulu 2020

Ukubonga Kotakulwe Ekufeni

Ihubo lokuvula indlu. ElikaDavide

¹ Ngiyakuphakamisa Simakade, ngokuba ungitakulile, awuvumanga ukuba izitha zami zithokoze ngami.

² Simakade, Nkulunkulu wami, ngikhale kuwe ngicela usizo, wangiphulukisa.

³ Simakade ukhulule umoya wami endaweni yabafileyo, wangigcina ngiphilile, angaze ngashona egodini.

⁴ Mdumiseni uSimakade, nina bathembekileyo bakhe, nibonge igama lakhe elingcwele.

⁵ Ngokuba intukuthelo yakhe ingeyesikhashana, umusa wakhe umi ingunaphakade. Ukulila kungadonsa kuze kuhlwe; injabulo iqhamuke ekuseni.

⁶ Mina ngathi lapho ngiphumelela: “Angisoze nganyakaziswa naphakade.”

⁷ Simakade ngomusa wakho, wangenza nganjengentaba eqinileyo. Usubufihlile ubuso bakho, ngadangala.

⁸ Ngakhala kuwe Simakade, nganxusa Nkosi yami, ngathi:

⁹ “Kunanzuzoni ukufa kwami, lapho ngishona phansi egodini na? Ngabe uthuli luzokudumisa yini na? Ngabe luzokhuluma ngokwethembeka kwakho na?

¹⁰ Yizwa, Simakade, ube nomusa kimi; Simakade yiba ngumsizi wami!”

¹¹ Ukulila kwami ukuphendule ijadu, wangikhumula ingubo yesaka, wangembathisa injabulo,

¹² ukuze umphefumulo wami ukudumise, ungaphezi. Simakade, Nkulunkulu wami, ngizokubonga kuze kube phakade.