AmaHubo 29 - IsiZulu 2020

Izwi LikaSimakade Esivunguvungwini

Ihubo likaDavide

¹ Mnikeni udumo uSimakade, nina zidalwa zezulu. Mnikeni uSimakade udumo, inkazimulo namandla.

² Mnikeni uSimakade udumo olufanele igama lakhe, mdumiseni uSimakade ebukhazikhazini bakhe obungcwele.

³ Izwi likaSimakade liphezu kwamanzi, uNkulunkulu wenkazimulo uyaduma; uSimakade uphezu kwamanzi amaningi.

⁴ Izwi likaSimakade linamandla. Izwi likaSimakade liyinkazimulo.

⁵ Izwi likaSimakade lephula imisedari; uSimakade uphoqoza imisedari eLebhanoni.

⁶ ILebhanoni alenze litshekule njengenkonyane, neSiriyoni, njengethole lenyathi.

⁷ Izwi likaSimakade lidlalisela kugqamuke amalangabi.

⁸ Izwi likaSimakade lizamazamisa ihlane, uSimakade unyakazisa ihlane; uSimakade unyakazisa ihlane eKadeshi.

⁹ Izwi likaSimakade liphunzisa izimbabala; liphundla amahlathi, konke okusethempelini lakhe kuthi: “Udumo!”

¹⁰ USimakade uhleli phezu kwezikhukhula, uSimakade uyiNkosi, ubusa kuze kube phakade.

¹¹ USimakade uzokupha abantu bakhe amandla. USimakade uzobusisa isizwe sakhe ngokuthula.