AmaHubo 27 - IsiZulu 2020

USimakade Ungukukhanya Kwami Nensindiso Yami

ElikaDavide

¹ USimakade ungukukhanya kwami nensindiso yami. Ngubani engingamesaba na? USimakade uyinqaba yokuphila kwami. Ngubani engingaba novalo ngaye na?

² Lapho abenzi bokubi besondela kimi ukuba bangisoconge, abamelene nami nezitha zami bayokhubeka, baqumbeke phansi.

³ Noma impi ingakanisa imelane nami, inhliziyo yami ayiyukwesaba, ngisho impi ingangivukela, nokho ngiyoba neqholo.

⁴ Kukodwa zwi engikucela kuSimakade, yilokhu nje engizimisele ukukwenza: ukuba ngihlale endlini kaSimakade zonke izinsuku zokuphila kwami, ngibuke ubuhle bukaSimakade, ngizindle ngisendlini yakhe.

⁵ Ngokuba uzongifihla edokodweni lakhe ngosuku lwenhlupheko, angicashise endaweni efihlakele ethendeni lakhe, angiphakamisele edwaleni.

⁶ Namanje ikhanda lami lizakuphakama phezu kwezitha zami ezingizungezile. Ngizonikela ngemihlatshelo, ngihlokome ngentokozo ngisethendeni lakhe. Ngihlabelele, ngidumise uSimakade ngokhehlegume.

⁷ Ngizwe Simakade, lapho ngikunxusa, ube nomusa kimi, ungiphendule.

⁸ Inhliziyo yami ithi uthe: “Funani ubuso bami,” inhliziyo yami ithi: “Ubuso bakho, Simakade, ngiyabufuna.”

⁹ Ungabufihli ubuso bakho kimi. Ungayixoshi inceku yakho ngentukuthelo; Wena uwusizo lwami, uze ungangilahli, ungangishiyi, Nkulunkulu wensindiso yami.

¹⁰ Nakuba ubaba nomame bengishiyile; uSimakade uzongemukela.

¹¹ Simakade, ngifundise indlela yakho, ungihole endleleni ehlelembekile ngenxa yezitha zami.

¹² Uze unganginikeli kokufiswa yizitha zami ngami, ngokuba ofakazi bamanga bangivukele, babhodla umlilo.

¹³ Ngiyethemba ukuthi ngizobubona ubuhle bukaSimakade, ezweni labaphilayo!

¹⁴ Lindela uSimakade, uqine, inhliziyo yakho ime isibindi. Yebo, lindela uSimakade.