AmaHubo 2 - IsiZulu 2020

Ogcotshiweyo KaSimakade

¹ Kungani abezizwe benza ugobe, nabantu beceba okuyize na?

² Amakhosi omhlaba ayazihlanganisa, nababusi baceba icebo ngogcotshiweyo kaSimakade, bathi:

³ “Asigqabule izibopho zabo, silahle izintambo abasibophe ngazo, zisuke kithi.”

⁴ Yena ohlezi ezulwini uyahleka, iNkosi iyababhuqa.

⁵ Iyakukhuluma nabo ngentukuthelo yayo, ibafake ingebhe ngolaka lwayo, ithi:

⁶ “Mina ngiyibekile inkosi yami, entabeni yami engcwele iZiyoni.”

⁷ Ngizakulanda ngesinqumo sikaSimakade, owathi kimi: “Wena uyindodana yami; namuhla ngikuzele.

⁸ Cela kimi, ngikunike abezizwe babe yifa lakho, nemikhawulo yomhlaba ibe ngeyakho.

⁹ Uyakubaphula ngentonga yensimbi, ubaphihlize njengokhamba lombumbi.”

¹⁰ Ngakho-ke hlakaniphani nina makhosi; niyaleke nina babusi bomhlaba.

¹¹ Khonzani uSimakade ngokwesaba, nithokoze ngokuthuthumela.

¹² Yangeni indodana, funa ithukuthele, bese nibhubha endleleni, ngokuba ulaka lwayo luvutha masinyane. Kepha babusisiwe bonke abaphephela kuyo.