AmaHubo 149 - IsiZulu 2020

Hubelani USimakade Ihubo Elisha

¹ Haleluya! Hubelani uSimakade ihubo elisha, izibongo zakhe, emhlanganweni wabathembekileyo.

² U-Israyeli makathokoze ngoMenzi wakhe, abantwana baseZiyoni bethabele iNkosi yabo.

³ Mabadumise igama lakhe ngokusina, bamhubele ngesigubhu nehabhu,

⁴ ngokuba uSimakade uyathokoza ngabantu bakhe abathobekileyo, ubahlobisa ngensindiso.

⁵ Abathembekileyo mabathokoze ngokunqoba, mabahlabelele ngentokozo.

⁶ Ukuphakamisa uNkulunkulu makube semilonyeni yabo, baphathe ngesandla inkemba ekhaliphe nhlangothi zombili,

⁷ ukuze baziphindiselele ezizweni, bajezise abezizwe.

⁸ Amakhosi abo bawabophe ngamaketanga, nabadumileyo babo, ngezibopho zensimbi,

⁹ ukuze babajezise ngesijeziso esilotshiweyo. Kuludumo kubo bonke abathembekileyo bakhe. Haleluya!