AmaHubo 138 - IsiZulu 2020

Ukubonga USimakade Ngenhliziyo Yonke

ElikaDavide

¹ Ngiyokubonga ngenhliziyo yami yonke, ngikuhubele phambi konkulunkulu.

² Ngiyakukhuleka phambi kwethempeli lakho elingcwele, ngibonge iGama lakho, ngenxa yomusa wakho neqiniso lakho, ngokuba phezu kwakho konke, uphakamisile iGama lakho nezwi lakho.

³ Ngosuku engakhala ngalo, wangiphendula; waqinisa umoya wami, ngaba namandla.

⁴ Wonke amakhosi omhlaba mawakubonge, Simakade, ngokuba ezwile amazwi omlomo wakho.

⁵ Mawahlabelele ngezindlela zikaSimakade, ngokuba inkulu inkazimulo kaSimakade.

⁶ Nakuba uSimakade ephakeme, uyamnakekela ophansi; ozidlayo umazi ekude.

⁷ Noma ngihamba ngikhungethwe ukuhlupheka, uyongilondoloza, uyokwelula isandla sakho ungivikele olakeni lwezitha zami, esokunene sakho singisindise.

⁸ USimakade uzoyifeza injongo yakhe ngami. Simakade, umusa wakho umi phakade, ungayishiyi imisebenzi yezandla zakho.