AmaHubo 136 - IsiZulu 2020

Ukubonga USimakade Nomusa Wakhe Omi Phakade

¹ Bongani uSimakade, ngokuba muhle, ngokuba umusa wakhe umi phakade.

² Bongani uNkulunkulu wonkulunkulu, ngokuba umusa wakhe umi phakade.

³ Bongani iNkosi yamakhosi, ngokuba umusa wayo umi phakade;

⁴ yona yodwa eyenza izimangaliso ezinkulu, ngokuba umusa wakhe umi phakade;

⁵ owenze izulu ngokuhlakanipha, ngokuba umusa wakhe umi phakade;

⁶ owendlale umhlaba phezu kwamanzi, ngokuba umusa wakhe umi phakade;

⁷ owenza izinkanyiso ezinkulu, ngokuba umusa wakhe umi phakade;

⁸ ilanga ukuba libuse emini, ngokuba umusa wakhe umi phakade;

⁹ inyanga nezinkanyezi ukuba kubuse ebusuku, ngokuba umusa wakhe umi phakade;

¹⁰ owabulala amazibulo abaseGibhithe, amazibulo alo, ngokuba umusa wakhe umi phakade;

¹¹ owamkhipha u-Israyeli phakathi kwabo, ngokuba umusa wakhe umi phakade,

¹² ngesandla esinamandla nangezikhwepha, ngokuba umusa wakhe umi phakade;

¹³ owehlukanisa kabili uLwandle Lomhlanga, ngokuba umusa wakhe umi phakade;

¹⁴ owawelisa u-Israyeli phakathi kwalo, ngokuba umusa wakhe umi phakade;

¹⁵ owachitha uFaro nempi yakhe oLwandle Lomhlanga, ngokuba umusa wakhe umi phakade;

¹⁶ owahola abantu bakhe ehlane, ngokuba umusa wakhe umi phakade;

¹⁷ owashaya amakhosi amakhulu, ngokuba umusa wakhe umi phakade;

¹⁸ owabulala amakhosi adumileyo, ngokuba umusa wakhe umi phakade:

¹⁹ uSihoni, inkosi yama-Amori, ngokuba umusa wakhe umi phakade,

²⁰ no-Ogi, inkosi yaseBhashani, ngokuba umusa wakhe umi phakade;

²¹ owabapha izwe labo laba yifa, ngokuba umusa wakhe umi phakade,

²² laba yifa lika-Israyeli, inceku yakhe, ngokuba umusa wakhe umi phakade;

²³ owasikhumbula sinqotshwe yizitha zethu, ngokuba umusa wakhe umi phakade;

²⁴ owasikhulula ezitheni zethu, ngokuba umusa wakhe umi phakade;

²⁵ opha bonke abantu ukudla, ngokuba umusa wakhe umi phakade.

²⁶ Bongani uNkulunkulu wezulu, ngokuba umusa wakhe umi phakade.