AmaHubo 135 - IsiZulu 2020

Indumiso KuSimakade Emagcekeni Edlu Yakhe

¹ Haleluya! Dumisani igama likaSimakade; mdumiseni nina zinceku zikaSimakade,

² enikhonza endlini yakhe, emagcekeni endlu kaNkulunkulu wethu.

³ Mdumiseni uSimakade, ngokuba Yena muhle, lihubeleni igama lakhe, ngokuba lihle.

⁴ Ngokuba uSimakade uziqokele uJakobe no-Israyeli, ukuba abe yifa lakhe.

⁵ Impela ngiyazi ukuthi uSimakade mkhulu, nokuthi iNkosi yethu ingaphezu konkulunkulu bonke.

⁶ Noma yini uSimakade ayithandayo uyayenza, ezulwini nasemhlabeni, emanzini nasezinzulwini zonke.

⁷ Ukhuphula izinkungu emikhawulweni yomhlaba, enze imibani ibe yimvula, akhiphe umoya ezinqabeni zakhe.

⁸ Washaya amazibulo aseGibhithe, awabantu nawezilwane.

⁹ Wathumela izibonakaliso nezimangaliso phakathi kwakho, Gibhithe, phezu kukaFaro nezinceku zakhe zonke.

¹⁰ Washaya izizwe ezinkulu, wabulala amakhosi anamandla:

¹¹ uSihoni, inkosi yama-Amori, u-Ogi, inkosi yaseBhashani, nemibuso yonke eKhanani.

¹² Wathatha izwe labo laba yifa, laba yifa lika-Israyeli, isizwe sakhe.

¹³ Simakade, igama lakho limi ingunaphakade. Simakade, ukhunjulwa yizizukulwane ngezizukulwane.

¹⁴ Ngokuba uSimakade uyokwehlulela abantu bakhe, azihawukele izinceku zakhe.

¹⁵ Izithombe zabezizwe ziyisiliva negolide, umsebenzi wezandla zomuntu.

¹⁶ Umlomo zinawo, kepha azikhulumi, amehlo zinawo, kodwa aziboni.

¹⁷ Izindlebe zinazo, kepha azizwa, nomoya awukho emlonyeni wazo.

¹⁸ Abazenzayo bayafana nazo, bonke abazithembayo.

¹⁹ Wena ndlu ka-Israyeli, mbonge uSimakade, wena ndlu ka-Aroni, mbonge uSimakade.

²⁰ Wena ndlu kaLevi, mbonge uSimakade, nina enimesabayo uSimakade, mbongeni uSimakade.

²¹ USimakade makabongwe eZiyoni, yena owakhe eJerusalema. Haleluya!