AmaHubo 118 - IsiZulu 2020

Ihubo Lokubonga Ubuhle Nomusa KaSimakade

¹ Bongani uSimakade ngokuba muhle, ngokuba umusa wakhe umi phakade.

² Makathi u-Israyeli: “Yebo, umusa wakhe umi phakade.”

³ Mayithi indlu ka-Aroni: “Yebo, umusa wakhe umi phakade.”

⁴ Mabathi abamesabayo uSimakade: “Yebo, umusa wakhe umi phakade.”

⁵ Osizini lwami ngakhuleka kuSimakade, uSimakade wangiphendula, wangihola endaweni ebanzi.

⁶ USimakade ungakimi, angiyukwesaba, umuntu angangenzani na?

⁷ USimakade ungakimi ekanye nabangisizayo, ngalokho ngiyakubabuka bephansi abangizondayo.

⁸ Kuhle ukuphephela kuSimakade kunokwethemba umuntu.

⁹ Kuhle ukuphephela kuSimakade, kunokwethemba izikhulu.

¹⁰ Zonke izizwe zingizungezile, egameni likaSimakade ngizozibhubhisa.

¹¹ Zingiphahlile, yebo, zingizungezile; egameni likaSimakade ngizozibhubhisa.

¹² Zingibunganyele njengezinyosi, zizocinywa njengomlilo wameva; egameni likaSimakade ngizozibhubhisa.

¹³ Ungihlohlolozile ukuze ngiwe, kodwa uSimakade uyangisiza.

¹⁴ USimakade ungamandla ami, nesihlabelelo sami, ube yinsindiso yami.

¹⁵ Izwi lokwethaba nelokusindiswa lisemathendeni abaqotho, isandla sokunene sikaSimakade sigile izimanga.

¹⁶ Esokunene sikaSimakade siphakeme, esokunene sikaSimakade sisebenza ngamandla.

¹⁷ Angizukufa; ngizophila, ngishumayele ngemisebenzi kaSimakade.

¹⁸ USimakade wangijezisa kanzima, kodwa akanginikelanga ekufeni.

¹⁹ Ngivuleleni amasango okulunga, ngingene ngawo, ngimdumise uSimakade.

²⁰ Yileli isango likaSimakade, olungileyo uyakungena ngalo.

²¹ Ngiyakukudumisa, ngokuba ungizwile, ube yinsindiso yami.

²² Itshe abalinqabayo abakhi, selaba yinhloko yegumbi.

²³ Lona lavela kuSimakade, liyisimangaliso emehlweni ethu.

²⁴ Yilolu usuku alwenzileyo uSimakade, siyakwethaba, sithokoze ngalo.

²⁵ Sindisa, Simakade, ngiyakuncenga! Hlahlamelisa, Simakade, ngiyakucela!

²⁶ Makabusiswe ozayo egameni likaSimakade, siyanibusisa sisendlini kaSimakade.

²⁷ USimakade unguNkulunkulu, usikhanyisele, hlobisani umkhosi ngamahlamvu, kuze kube sezimpondweni ze-althare.

²⁸ Wena unguNkulunkulu wami, ngiyakubonga, Nkulunkulu wami, ngiyakuphakamisa.

²⁹ Bongani uSimakade, ngokuba muhle, ngokuba umusa wakhe umi phakade.