AmaHubo 116 - IsiZulu 2020

Ukudumisa Kosindisiweyo

¹ Ngiyamthanda uSimakade, ngokuba uyalizwa izwi lokukhuleka kwami.

² Ngokuba ubeke indlebe yakhe kimi, ngizokhuleka kuye ngisaphila.

³ Izintambo zokufa zingithandele, nobuhlungu bendawo yabafileyo bungibambile, ngibhekene nosizi nezinhlupheko.

⁴ Ngase ngibiza igama likaSimakade, ngathi: “Ngiyakuncenga, Simakade, hlenga umphefumulo wami.”

⁵ USimakade unomusa, ulungile, uNkulunkulu wethu unobubele.

⁶ USimakade uyamvikela ongenakuzisiza; lapho ngithotshisiwe, Yena wangisindisa.

⁷ Buyela endaweni yakho yokuphumula, mphefumulo wami, ngokuba uSimakade ukuphathe ngomusa.

⁸ Impela uwuhlengile umphefumulo wami ekufeni, namehlo ami, ezinyembezini, nezinyawo zami, ekukhubekeni.

⁹ Ngizohamba phambi kukaSimakade ezweni labaphilayo.

¹⁰ Ngiyakholwa, yingakho ngathi: “Ngihlushwe ngokweqile.”

¹¹ Ngisosizini, ngathi: “Bonke abantu banamanga.”

¹² Ngiyakumnikani uSimakade ngazo zonke izenzo zakhe ezinhle angenzele zona na?

¹³ Ngiyophakamisa indebe yensindiso, ngilibize igama likaSimakade.

¹⁴ Ngiyakufeza izithembiso zami kuSimakade, yebo, naphambi kwabo bonke abantu bakhe.

¹⁵ Kuyigugu emehlweni kaSimakade, ukufa kwabangcwele bakhe.

¹⁶ Impela ngiyinceku yakho Simakade, ngiyinceku yakho, indodana yencekukazi yakho, uzikhumulile izintambo zami.

¹⁷ Ngiyakunikela kuwe umnikelo wokubonga, ngibize igama likaSimakade.

¹⁸ Ngiyakufeza izithembiso zami kuSimakade, yebo, naphambi kwabo bonke abantu bakhe,

¹⁹ emagcekeni endlu kaSimakade, phakathi kwakho, Jerusalema. Haleluya!