AmaHubo 113 - IsiZulu 2020

Ukudumisa USimakade Ophakamisa Ompofu

¹ Haleluya! Mdumiseni uSimakade zinceku zakhe, dumisani igama likaSimakade.

² Malibongwe igama likaSimakade, kusukela manje, kuze kube phakade.

³ Malidunyiswe igama likaSimakade, kusukela ekuphumeni kwelanga, lize liyoshona.

⁴ USimakade uphakeme phezu kwezizwe zonke, inkazimulo yakhe iphezu kwamazulu.

⁵ Ngubani onjengoSimakade uNkulunkulu wethu, ohleli phezulu,

⁶ ozithobayo, abone ezulwini nasemhlabeni na?

⁷ Uvusa ontulayo othulini, amphakamise ompofu ezaleni,

⁸ amhlalise nezikhulu, iziphathimandla zabantu bakhe.

⁹ Inyumba uyayipha ukuphatha umuzi, ibe ngunina othokozayo wabantwana. Haleluya!