2 AmaKhosi 9 - IsiZulu 2020

UJehu Uyinkosi Kwa-Israyeli

¹ U-Elisha, umphrofethi, wabiza enye yamadodana abaphrofethi, wathi kuyo: “Bhinca ingubo yakho okhalo, uthathe lo mfuma wamafutha ngesandla, uye eRamothi Gileyadi.

² Uyothi ungafika khona, ufune uJehu, indodana kaJehoshafathi kaNimishi. Uyongena, umsukumise phakathi kwabafowabo, umyise ekamelweni elingaphakathi.

³ Uyothatha umfuma wamafutha, uwathele ekhanda lakhe, uthi kuye: ‘Usho kanje uSimakade, uthi: “Ngiyakugcoba ukuba ube yinkosi kwa-Israyeli.” ’ “Bese uvula umnyango, qede ubaleke, ungalibali.”

⁴ Leyo nsizwa eyayingumphrofethi, yahamba yalibangisa eRamothi Gileyadi.

⁵ Yafika khona yafica abakhuzi bempi behleli, yayisithi: “Ake silumane indlebe nawe, nduna.” UJehu wathi: “Usho bani phakathi kwethu na?” Yathi: “Ngisho kuwe, nduna.”

⁶ Wasukuma, wangena endlini, yayisimthela ngamafutha ekhanda, yathi kuye: “Usho kanje uSimakade uNkulunkulu ka-Israyeli, uthi: ‘Ngiyakugcoba ukuba ube yinkosi yabantu bakaSimakade, u-Israyeli.

⁷ Uyakuyibhubhisa indlu ka-Ahabi, inkosi yakho, ukuze ngiphindiselele igazi lezinceku zami, abaphrofethi, negazi lezinceku zonke zikaSimakade elachithwa yisandla sikaJezebheli.

⁸ Yonke indlu ka-Ahabi iyakubhujiswa; ngiyoqothula wonke owesilisa ka-Ahabi kusukela komncane kuya komdala.

⁹ Ngiyoyenza indlu ka-Ahabi ifane nendlu kaJerobhowamu, indodana kaNebhathi, nanjengendlu kaBhahasha, indodana ka-Ahiya.

¹⁰ Izinja ziyakumudla uJezebheli esifundeni eJizreyeli. Akukho muntu oyakummbela.’ ” Yayisivula umnyango, yabaleka.

¹¹ UJehu waphumela phandle ezincekwini zenkosi yakhe. Enye yazo, yathi kuye: “Ngabe konke kusalungile yini na? Beluzofunani lolu hlanya na?” Wathi kuzo: “Niyamazi nina lowo muntu nakushilo.”

¹² Kepha, zathi: “Ngamanga lawo; ake usitshele.” Wayesethi kuzo: “Usho lokhu nalokhu kimi, ethi: ‘Usho kanje uSimakade uthi: ngiyakugcoba ukuba ube yinkosi kwa-Israyeli.’ ”

¹³ Ngokushesha, zathatha kwaba yileyo naleyo ingubo yayo, zazibeka phansi kwakhe esikhwelweni, zase zibetha icilongo, zathi: “UJehu uyinkosi.”

Ukubulawa KukaJoramu Inkosi Yakwa-Israyeli

¹⁴ UJehu, indodana kaJehofathathi, wamakhela uzungu uJoramu. UJoramu wayesalokhu elinde eRamothi Gileyadi kanye nawo wonke u-Israyeli, ngenxa kaHazayeli, inkosi yase-Aramu.

¹⁵ Inkosi uJoramu yayibuyile eJizreyeli ukuze yelashwe amanxeba ayo eyayiwalinyazwe ngama-Aramu ngesikhathi belwa noHazayeli inkosi yakhona. UJehu wathi: “Uma lokhu kuvela kini, makungabaleki muntu aphume emzini, ukuze ayobika eJizreyeli.”

¹⁶ UJehu wagibela enqoleni, walibangisa eJizreyeli, ngoba uJoramu wayelele lapho. U-Ahaziya, inkosi yakwaJuda, wayehlele khona ukuyobona uJoramu.

¹⁷ Umlindi owayemi embhoshongweni eJizreyeli wabona iviyo likaJehu liza, wayesethi: “Ngibona iviyo liza.” UJoramu wathi: “Thumela ogibele ihhashi abahlangabeze, ababuze, athi: ‘Nize ngokuthula yini na?’ ”

¹⁸ Owayegibele ihhashi wabahlangabeza, wathi kubo: “Isho kanje inkosi, ithi: ‘Nize ngokuthula yini na?’ ” UJehu wathi: “Unandabani nokuthula wena na? Qhela phambi kwami, ubuyele emva kwami.” Umlindi wabuye wabika, wathi: “Isithunywa sesifikile kubo, kodwa asibuyile.”

¹⁹ Wayesethumela owesibili egibele ihhashi, waya kubo, wathi: “Isho kanje inkosi, ithi: ‘Nize ngokuthula yini na?’ ” UJehu wathi: “Unandabani nokuthula wena na? Qhela phambi kwami, ubuyele emva kwami.”

²⁰ Umlindi wabika, wathi: “Sesifikile naleso kubo, kepha naso asibuyile. Ukushayela kwaso kufana nokushayela kukaJehu oqhuba sengathi luhlanya.”

²¹ UJehoramu wayesethi: “Bophelani.” Base beyibophela-ke inqola yakhe. UJehoramu, inkosi yakwa-Israyeli, no-Ahaziya, inkosi yakwaJuda, baphuma bayomhlangabeza uJehu, kuyilowo nalowo egibele enqoleni yakhe. Bamfica esiqeshini sezwe likaNabothi waseJizreyeli.

²² Kwathi ukuba uJoramu ambone uJehu, wayesethi: “Uze ngokuthula yini, Jehu na?” Wathi: “Ukuthula kwani, kusekuningi kangaka ukufeba nokulumba kukanyoko uJezebheli?”

²³ UJehoramu waphenduka wacela empunzini, wamemeza u-Ahaziya, wathi: “Wugobe, Ahaziya!”

²⁴ UJehu wayesensala umnsalo, waciba uJehoramu, umcibisholo wangena phakathi kwamahlombe akhe, waze wayophumela enhliziyweni yakhe, wawela phansi enqoleni yakhe.

²⁵ UJehu wathi kuBhidikhari, induna yakhe: “Mthathe, umphonse esiqintini sezwe likaNabothi waseJizreyeli. Khumbula ukuthi ngesikhathi mina nawe sigibele silandela u-Ahabi, uyise, uSimakade walusho lolu daba ngaye,

²⁶ wathi: ‘Ngenxa yegazi likaNabothi, negazi lamadodana akhe engilibonile izolo,’ kusho uSimakade, ‘ngiyakuphindisela kuwe kulesi siqinti sezwe,’ kusho uSimakade. Ngalokho-ke, mthathe umdinsile kulesi siqinti sezwe njengokusho kwezwi likaSimakade.”

²⁷ U-Ahaziya, inkosi yakwaJuda, esekubonile lokho, wabaleka ngendlela eseBhethi Hagani, nokho uJehu wamhlala ezithendeni, wathi: “Mbulaleleni naye enqoleni yakhe.” Bambulala enqoleni yakhe emmangweni eGuri ongaseJibhileyamu. Wabalekela eMegido, wafela lapho.

²⁸ Izinceku zakhe zamyisa ngenqola eJerusalema, zammbela ethuneni lakhe nokhokho bakhe, emzini kaDavide.

²⁹ Ngonyaka we-11 wokubusa kukaJoramu, indodana ka-Ahabi, u-Ahaziya waba yinkosi kwaJuda.

Ukubulawa KukaJezebheli

³⁰ UJehu waya eJizreyeli, uJezebheli wezwa ngalokho, wayesegqaba amehlo akhe, wazihlobisa ikhanda, walunguza ngefasitela.

³¹ UJehu esengena esangweni wathi: “Kusahleziwe kahle yini, wena Zimri, mbulali wenkosi yakho na?”

³² Waphakamisa ubuso bakhe, wabheka ngasefasiteleni, wathi: “Ngubani ongakimi? Ngubani na?” Kwase kulunguza izinduna ezimbili noma ezintathu.

³³ Wayesethi kuzo: “Mphonseni phansi.” Zamphonsa, igazi lakhe lasaphazekela odongeni nasemahhashini. Wamfihliza ngezinyawo zakhe.

³⁴ Wangena, wadla, waphuza, wayesethi: “Mbhekeni lo mqalekiswakazi, nimmbele, ngoba uyindodakazi yenkosi.”

³⁵ Bahamba bayombheka ukuze bammbele, nokho abatholanga lutho ngaphandle kwekhanda, izinyawo, nezintende zezandla.

³⁶ Babuyela kuye bambikela. Wathi: “Yizwi likaSimakade alikhuluma ngomlomo wenceku yakhe u-Eliya waseThishibhi, ethi: esiqeshini sezwe eJizreyeli izinja ziyokudla inyama kaJezebheli.

³⁷ Isidumbu sikaJezebheli siyokuba njengomquba phezu komhlabathi, esiqintini sezwe eJizreyeli, ukuze kungabi bikho muntu oyakuthi: ‘Nangu uJezebheli.’ ”