2 AmaKhosi 2 - IsiZulu 2020

USimakade Wenyusela U-Eliya Ezulwini

¹ Kwathi lapho uSimakade esezomthatha u-Eliya amenyusele ezulwini ngesishingishane, u-Eliya no-Elisha basuka eGiligali.

² U-Eliya wathi ku-Elisha: “Ake uhlale lapha, ngokuba uSimakade ungithumele eBhethele.” Kepha u-Elisha wathi: “Ngifunga ngiyagomela phambi kukaSimakade, naphambi kwakho, angisoze ngisuke kuwe.” Base behlela eBhethele.

³ Amadodana abaphrofethi ayeseBhethele aphuma aya ku-Elisha, athi kuye: “Uyazi yini ukuthi namuhla uSimakade uzoyithatha inkosi yakho na?” Wathi: “Yebo, ngiyazi; thulani.”

⁴ U-Eliya wathi kuye: “Elisha, ake usale lapha, ngokuba uSimakade ungithume eJerikho.” Kepha yena wathi: “Ngifunga ngiyagomela phambi kukaSimakade naphambi kwakho, angisoze ngakushiya.” Base beya eJerikho.

⁵ Amadodana abaphrofethi ayeseJerikho asondela ku-Elisha, athi kuye: “Uyazi yini ukuthi namuhla uSimakade uzoyithatha inkosi yakho na?” Wathi: “Yebo, ngiyazi; thulani.”

⁶ U-Eliya wathi ku-Elisha: “Ake usale lapha, ngokuba uSimakade ungithume eJordani.” Kepha yena wathi: “Ngifunga ngiyagomela phambi kukaSimakade naphambi kwakho, angisoze ngakushiya.” Base behamba bobabili.

⁷ Abantu abangama-50, amadodana abaphrofethi bahamba bema buqamama maqondana nabo, bona bobabili bama ngaseJordani.

⁸ U-Eliya wathatha isembatho sakhe, wasisonga, washaya amanzi, ehlukana ngapha nangapha, bawela iJordani bobabili, behamba emhlabathini owomileyo.

⁹ Kwathi besawela iJordani, u-Eliya wathi ku-Elisha: “Cela ukuthi ufisa ngikwenzeleni ngaphambi kokuba ngisuswe kuwe.” U-Elisha wathi: “Umoya wakho mawuphindwe kabili kimi.”

¹⁰ Wathi: “Ucele into elukhuni, nokho-ke uma ungibona lapho ngisuswa kuwe, kuyokwenzeka kanjalo kuwe, kodwa uma ungangibonanga, akuyukuba kanjalo.”

¹¹ Kwathi besalokhu behamba bexoxa, bheka, kwaqhamuka inqola yomlilo namahhashi omlilo, abehlukanisa, u-Eliya wenyukela ezulwini ngesivunguvungu.

¹² U-Elisha wakubona lokho, wamemeza, wathi: “Baba, baba, inqola yempi ka-Israyeli nabamahhashi bakhe!” Akabange esambona futhi; wabamba izingubo zakhe waziklebhula kabili.

U-Elisha Ushaya Amanzi Ngesembatho Sika-Eliya

¹³ Wacosha isembatho sika-Eliya esasiwe kuye, waphindela emuva, wema osebeni lweJordani.

¹⁴ Wasithatha isembatho sika-Eliya, esasiwe kuye, washaya ngaso amanzi, wathi: “Uphi uSimakade, uNkulunkulu ka-Eliya na?” Esewashayile amanzi, ahlukana ngapha nangapha, u-Elisha wawela.

¹⁵ Amadodana abaphrofethi ayeseJerikho, ebuqamama, ambona, athi: “Umoya ka-Eliya wehlele phezu kuka-Elisha.” Asuka ayomhlangabeza, akhothama athi mbo emhlabathini phambi kwakhe.

¹⁶ Athi kuye: “Bheka, phakathi kwethu izinceku zakho kunamadoda angama-50 anamandla. Mawahambe ayofuna inkosi yakho, hleze uMoya kaSimakade uyikhuphulile, wayilahla entabeni thizeni noma esigodini.” Kepha wathi: “Ningawathumi.”

¹⁷ Amncengisisa waze waba namahloni, wayesethi: “Athumeni.” Ayesethuma abantu abangama-50, bamfuna izinsuku ezintathu, kodwa abamtholanga.

¹⁸ Abuyela kuye, amfica eselokhu eseJerikho, wayesethi kuwo: “Angishongo yini ukuthi ningahambi na?”

¹⁹ Abantu ababehlala emzini bathi ku-Elisha: “Uyabona, umuzi usendaweni enhle, njengokuba nenkosi izibonela nje, kodwa amanzi mabi, nezwe alinakudla.”

U-Elisha Welapha Amanzi Ngosawoti

²⁰ U-Elisha wathi: “Lethani kimi isitsha esisha, nifake usawoti kuso.” Basiletha kuye.

²¹ Waphuma waya emthonjeni wamanzi, waphonsa kuwo usawoti, wathi: “Usho kanje uSimakade: ‘Ngiwelaphile lawa manzi, akuseyukuba bikho kufa kuwo, nakuphunza, nakuphuphuma kwezisu.’ ”

²² Amanzi elapheka kusukela ngaleso sikhathi kuze kube yinamuhla, njengalokhu asho u-Elisha.

U-Elisha Uqalekisa Abafana Abamgconayo EBhethele

²³ Wasuka lapho wenyukela eBhethele. Esendleleni, kwaphuma abafana emzini, bamgcona, bathi: “Yenyuka mpandla ndini! Yenyuka mpandla ndini!”

²⁴ Waphenduka, wababona, wabaqalekisa egameni likaSimakade, kwase kuphuma ehlathini amabhere ezinsikazi amabili abadwengula labo bafana ababengama-42.

²⁵ Wasuka lapho, waya entabeni iKharmeli, wayesebuyela eSamariya.