2 AmaKhosi 1 - IsiZulu 2020

Ukugula, Ukujeziswa Nokukhothama Kuka-Ahaziya Inkosi Yakwa-Israyeli

¹ Emva kokufa kuka-Ahabi, uMowabi wamvukela u-Israyeli.

² U-Ahaziya waphuma ngefasitela lekamelo lakhe eliphezulu elaliseSamariya wawa, wagula. Wathumela izithunywa, wathi kuzo: “Hambani niyongihlolela kuBhali Zebhubhi, unkulunkulu wase-Ekhroni, ukuthi ngizolulama yini kulokhu kugula.”

³ Kepha ingelosi kaSimakade yathi ku-Eliya waseThishibhi: “Suka, wenyuke uhlangabeze izithunywa zenkosi yaseSamariya, uthi kuzo: ‘Kungenxa yokuba kungekho Nkulunkulu yini kwa-Israyeli ukuba nihambe niyohlola kuBhali Zebhubhi, unkulunkulu wase-Ekhroni na?’ ”

⁴ Ngakho-ke usho kanje uSimakade, uthi: “Umbhede olele kuwo awuyukwehla kuwo; impela uzokufa.” U-Eliya wayesesuka.

⁵ Izithunywa zaphindela enkosini, yathi kuzo: “Nibuyeleni na?”

⁶ Zaphendula zathi: “Sihlangane nendoda ethe kithi: ‘Hambani, niphindele enkosini enithumileyo, nithi kuyo: “Usho kanje uSimakade, uthi: kungenxa yokuba kungekho Nkulunkulu yini kwa-Israyeli ukuba nihambe niyohlola kuBhali Zebhubhi, unkulunkulu wase-Ekhroni na? Ngalokho umbhede olele kuwo awuyukwehla kuwo, impela uyakufa.” ’ ”

⁷ Inkosi yathi kuzo: “Ibinjani leyo ndoda ekhuphuke yanihlangabeza, yakhuluma kini lawo mazwi?”

⁸ Zayiphendula zathi: “Yindoda ebiphuphuzela uboya, ibhince ibhande lesikhumba okhalo lwayo.” Yayisithi: “Bekungu-Eliya waseThishibhi.”

⁹ Inkosi yathumela induna yabangama-50 inamadoda angama-50. Yenyukela ku-Eliya; wayehleli esiqongweni sentaba, yathi kuye: “Muntu kaNkulunkulu, inkosi ithi kuwe: ‘Yehla.’ ”

¹⁰ Kepha u-Eliya wayiphendula induna yabangama-50, wathi: “Uma ngiyindoda kaNkulunkulu, makwehle umlilo ezulwini uniqothule, wena nalaba abangama-50.” Umlilo wehla uvela ezulwini wayiqothula nabangama-50 eyayinabo.

¹¹ Inkosi yabuye yathumela kuye enye induna yabangama-50 namabutho angama-50. Yafike yathi kuye: “Muntu kaNkulunkulu, ithi inkosi kuwe: ‘Yehla ngokushesha.’ ”

¹² Kepha wabaphendula wathi: “Uma ngiyindoda kaNkulunkulu, makwehle umlilo ezulwini uniqothule, wena nalaba abangama-50.” Umlilo kaNkulunkulu wehla ezulwini wayiqothula nabangama-50 eyayinabo.

¹³ Yabuye yathumela induna yesithathu yabangama-50 inama-50 ayo. Yakhuphuka leyo nduna yesithathu, yafike yaguqa phambi kuka-Eliya, yamncenga, yathi: “Muntu kaNkulunkulu ngiyakunxusa, ukuphila kwami nokwalezi zinceku zakho ezingama-50 makube yigugu emehlweni akho.

¹⁴ Bheka, kwehle umlilo uvela ezulwini, waqothula izinduna ezimbili zokuqala zabangama-50, kodwa manje ngiyakunxusa, impilo yami mayibe yigugu emehlweni akho.”

¹⁵ Ingelosi kaSimakade yathi ku-Eliya: “Yehla nayo, ungayesabi.” U-Eliya wasukuma, wehla nayo, waya enkosini.

¹⁶ Wathi kuyo: “Usho kanje uSimakade: ‘Lokhu uthumele izithunywa ukuyohlola kuBhali Zebhubhi, unkulunkulu wase-Ekhroni, yingoba kungekho Nkulunkulu yini kwa-Israyeli ukuba ubuze izwi lakhe na? Ngakho-ke, umbhede olele kuwo ngeke usehla kuwo, kodwa uzokufa nokufa.’ ”

¹⁷ Yafa njengokwezwi likaNkulunkulu alikhuluma ngo-Eliya. UJehoramu waba yinkosi esikhundleni sakhe ngonyaka wesibili wokubusa kukaJehoshafathi, inkosi yakwaJuda, ngoba u-Ahaziya wayengenandodana.

¹⁸ Ezinye izindaba zika-Ahaziya azenzayo, azilotshiwe yini encwadini yezindaba zemihla ngemihla yamakhosi akwa-Israyeli na?